ᐅᐣᑌᕒᐃᔪ ᐅᑭᒪᐏᐣ ᑭᑭᐅᑌᐘᐠ ᐃᐃᒪ ᐁᐢᑯᕒ ᑲᐯᔑᐏᓂᐠ

ᐏᐸᐨ ᑲᒪᒋᓇᑭᓱᐨ ᐅᐠᑐᐳᕒ, ᐊᑯᑭᐠ, ᐍᐱᑵ ᒥᓇ Noront ᐅᑭᑭᐅᑌᐦᐊᐘᐣ ᐃᐃᒪ ᑲᐃᔑᐊᑌᐠ ᐁᐢᑯᕒ ᑲᐯᔑᐏᐣ ᐃᓂᐍᓂᐘᐣ MPP ᐅᐣᑌᕒᐃᔪ ᐅᑭᒪᐏᐣ ᑲᓂᑲᓂᐡᑲᒧᐘᐨ ᐊᓄᑭᐏᓇᐣ ᐃᓂᐍᓂᐘᐣ ᑎᓄᑲᐣ ᓄᑕᓯᓂᑫᐏᓇᐣ ᒥᓇ ᐊᓂᔑᓂᓂᐏ ᐏᒋᐏᑎᐏᓇᐣ: ᐅᑭᒪ ᒪᔾᑯᓬ ᑯᕒᐊᐯᓬ, ᐅᑭᒪ ᑌᐱᐟ ᓯᒧᕒ ᒥᓇ ᐅᑭᒪ ᐱᓬ ᒫᕒᐅ᙮

ᐅᑭᒪᑲᐣ ᐳᕒᐅᐢ ᐊᒋᓂᐱᓀᐡᑲᒼ ᒥᓇ ᐅᑭᒪᑲᐣ ᑲᓀᓂᔭᐢ ᐘᐸᐢ ᐅᑭᑌᐱᓇᐘᐣ ᐃᓂᐍᓂᐘᐣ ᐅᑭᒪᐣ ᑲᑕᑯᔑᓂᓂᐨ, ᐁᐊᑭᓱᐡᑲᒧᐘᐨ ᐊᓂᔑᓂᓂᐏ ᐊᐦᑭᐣ ᐃᐃᒪ ᑲᑕᔑᓄᑕᓯᓂᑲᓂᐘᐠ᙮

ᐅᑭᒪᐠ ᑲᓂᐸᐏᐘᐨ ᐅᑭᑕᑲᒥᐠ ᒥᑭᓯᐤ ᐘᓴᓴᐣ ᑲᐃᔑᐊᐱᐨ ᔓᓂᔭᐏᐊᓯᓂᐠ ᑲᐃᓇᐱᐨ ᐊᓇᒪᑲᒥᐠ 1,600 ᑕᓱᒥᓯᐟ

ᑲᑭᓇᒋᑲᓂᐘᐠ ᐃᐃᐍ ᑲᑭᐱᑭᐅᑌᐘᐨ ᐃᐃᐍ ᒋᐘᐸᑕᐦᐊᑲᓀᐘᐨ ᐅᐅᐍᑎᓀᑫ ᓂᑲᓂᐠ ᑲᑭᓂᑿᓇᑌᐠ ᐃᐡᑯᑌᐏᐊᐦᑭᐠ ᑫᐊᓂᔑᓇᑯᐠ, ᐁᐘᐸᑕᐦᐃᐍᓇᓂᐘᐠ ᑲᐃᔑ ᐱᒥ ᐏᑕᓄᑭᒥᑎᐘᐨ ᑲᓄᑕᓯᓂᑫᐏ ᒪᒋᑕᐘᐨ ᒥᓇ ᐃᐡᑯᓂᑲᓇᐣ᙮ ᑲᑭᐱᑭᐅᑌᐘᐨ ᒥᓇ ᐅᑭᐘᐸᑕᓇᐘ ᐯᔓᐣᐨ ᐁᐏᑕᓄᑭᒥᑎᐘᐨ ᐊᓄᑭᓇᑲᓇᐠ ᐃᐃᒪ ᑲᑕᓇᓄᑭᐘᐨ ᒥᓇ ᐊᐘᔑᒣ ᐊᐱᑕ ᐊᓄᑭᓇᑲᓇᐠ ᐯᔓᐣᐨ ᐃᐡᑯᓂᑲᓇᐣ ᐁᐅᐣᒋᐘᐨ ᐊᓂᔑᓂᓂᐏ ᓇᐯᐘᐠ ᒥᓇ ᐃᑵᐘᐠ᙮ ᒋᓂᓯᑐᑕᑎᓇᓂᐘᐠ ᒥᓇ ᒋᑭᒋᓀᒋᑲᑌᑭᐣ ᑲᐃᔑ ᐊᓂᔑᓂᓂᐏᓇᓂᐘᐠ ᒥᓇ ᒋᐏᑕᓄᑭᒥᑎᓇᓂᐘᐠ ᒋᑲᓇᐍᒋᑲᑌᐠ ᐊᐦᑭᐏ ᓇᑲᒋᒋᑫᐏᐣ ᑲᑭᔑᐏᒋᑲᑌᐠ ᐃᐃᒪ ᑭᑭᓇᐘᒋᒋᑫᐏ ᓇᓇᑯᒧᐏᔑᒋᑫᐏᐣ ᑲᑭᑐᑕᐠ ᑭᒋᔭᔭᔾ ᕒᐋᔾ ᐢᐯᓂᐢ᙮

ᑲᑭᐸᐸᒥᔭᔭᐘᐨ ᑭᑕᑯᓯᒋᑲᑌ ᒋᑭᐅᑌᐘᐨ ᐃᐃᒪ ᑲᓂᔑᐊᓴᑲᓀᐘᐨ ᐊᓯᓂᐠ ᑲᑭᒧᓇᐦᐊᑲᓀᐘᐨ ᐘᑲᐦᐃᑲᓂᐠ ᐁᑭᐘᐸᑕᐦᐊᑲᓀᐘᐨ ᐊᓯᓂᐣ ᑲᑭᐅᑎᓇᑲᓀᐨ ᐃᐃᒪ ᒪᐠᐹᓬᐟᐢ ᒥᑭᑫᐏᓂᐠ, ᒥᓇ ᐁᑭᑐᒋᑲᑌᐠ ᒋᐸᐸᒥᓭᐘᐨ ᑲᑭᔑᐸᔭᑯᐱᑌᐠ ᐁᑭᓇᐱᓇᓂᐘᐠ ᒥᑭᓯᐤ ᐘᓴᓴᓂᐠ, ᒪᑲᑌᐏ ᑖᕒ ᒥᓇ ᒪᐠᐹᓬᐟᐢ ᓴᑲᐦᐃᑲᓂᐠ᙮ ᑲᑭᑭᒋᓀᑕᑯᐠ ᒣᑿᐨ ᑲᑭᐱᑭᐅᑌᐘᐨ ᐁᑭᓂᐸᐏᐘᐨ ᐃᐃᒪ ᐃᐡᐸᑎᓇᐠ ᒥᑭᓯᐤ ᐘᓴᓴᓂᐠ, ᑲᐃᔑᐊᐱᐨ ᐊᐊᐍ ᐊᓯᐣ ᐊᓇᒪᑲᒥᐠ 1,600 ᑕᓱᒥᓯᐟ ᑿᔭᐠ ᐊᓇᒪᑲᒥᐠ ᑲᑭᔑᓂᐸᐏᐘᐨ᙮ ᒥᓇ ᑯᑕᐠ ᑲᑭᑭᒋᓀᑕᑯᐠ ᐃᑭᐍᓂᐘᐠ ᐁᐢᑯᕒ ᐊᓄᑭᓇᑲᓇᐠ ᐁᑭᐘᐸᒪᐘᐨ ᐅᑭᒪᑲᓇᐣ ᐁᑲ ᒪᔑ ᑲᑕᑯᔑᓄᐘᐨ ᐅᑭᒪᐠ ᐁᑭᐏᑕᒧᐘᐨ ᐊᓂᐣ ᐁᓀᑕᒧᐘᐨ ᒣᑿᐨ ᑲᑕᓇᓄᑭᐘᐨ ᐃᐃᒪ ᑭᐍᑎᓄᐠ ᑲᑕᔑᓄᑕᓯᓂᑲᓂᐘᐠ ᑲᐯᔑᐏᐣ᙮

Noront ᐃᓇᒋᑫᐘᐠ ᒋᐅᔑᑐᐘᐨ ᓄᑕᓯᓂᑫᐏᑲᒥᑯᐣ ᐃᐃᐍ ᒋᔑᓇᑯᑭᐣ ᒋᑭᑕᑯᓂᑲᑌᑭᐣ, ᒋᑭᒋᓀᒋᑲᑌᑭᐣ ᒥᓇ ᒋᐏᑕᓄᑭᓭᑭᐣ ᐃᐃᒪ ᐯᔓᐣᐨ ᑕᔑᑫᐏᓇᐣ ᑲᐃᔑᓇᑯᒋᑫᒪᑲᑭᐣ᙮ ᓂᓇᑕᐍᑕᒥᐣ ᒋᑭᐘᐸᑕᒪᐠ ᒥᓄᓭᐏᓇᐣ ᐃᐃᐍ ᑲᑐᑕᒪᐠ ᒋᐅᐣᒋ ᐏᒋᐦᐃᐍᓭᐠ ᒋᐅᐣᒋ ᒥᓄᔭᓂᐘᐠ ᒥᓇ ᒋᐅᐣᒋ ᒥᓄᓭᓇᓂᐘᐠ ᑲᐯᔑᓇᑯᑭᐣ ᐃᐡᑯᓂᑲᓇᐣ᙮ ᐅᓄᐍᓂᐘᐠ ᑲᐸᐸᒥᐘᐸᑕᐦᐃᐍᓇᓂᐘᐠ ᐅᐣᒋ ᐏᒋᐦᐃᐍᓭ ᒋᐏᒋᑲᑌᐠ ᒥᓇ ᒋᐘᐸᑕᐦᐃᐍᓇᓂᐘᐠ ᐊᔕ ᐁᓂᒪᒋᑕᓂᐘᐠ ᒋᑌᐱᓂᑲᑌᑭᐣ ᐅᓄᐍᓂᐘᐣ ᑲᑲᑵᑌᐱᓂᑲᑌᑭᐣ᙮