ᐊᓄᑭᓇᑲᐣ ᐅᑎᐸᒋᒧᐏᐣ – ᑭᓬᐁᐣ ᓄᓬᐊᐣ

ᐃᔑᓂᑲᓱᐎᐣ:
ᑭᓬᐁᐣ ᓄᓬᐊᐣ

ᐃᐡᑯᓂᑲᐣ:
ᒥᓯᓇᐱ ᒪᐡᑭᑯ ᐃᐡᑯᓂᑲᐣ

ᑭᑕᓄᑭᐎᐣ:
ᑲ ᐊᓂᑫᐏ ᐅᑭᒪᐏᐨ, ᐅᑭᒪᐏᓇᐣ ᓇᑲᒋᒋᑫᐏᐣ

 

ᐊᓂᐣ ᑲᑭᐅᒋᒪᒋᑕᔭᐣ ᐅᐅᒪ ᑲᓄᑕᓯᓂᑲᓂᐘᐠ ᒪᒋᑕᐏᐣ?

ᑲᑭᐅᒋᒪᒋᑕᔭᐣ ᒣᑿᐨ ᑲᓂᐱᐠ ᑲᓄᑭᐘᐨ ᑭᑭᓄᒪᐘᑲᓇᐠ ᐃᐃᒪ ᑫᓬᐊᐣᐟ ᐅᕒ ᒣᑿᐨ ᐊᐦᑭᐏᐣ 1976 ᐁᑭᐸᑭᑎᓂᑯᔭᐣ ᒋᑲᑵᒋᑐᔭᓇᐣ ᒥᔑᐣ ᐊᓄᑭᐏᓇᐣ — ᑎᓄᑲᐣ ᐸᒥᒋᑫᐏᓇᐣ (ᐁᑭᓇᑕᐍᑕᑯᓯᔭᐣ ᒋᑭᓯᓇᒪᓂᐣ ᒥᔑᐣ ᒥᓯᐏᑲᒥᑯᐣ, ᐁᑕᓱᑭᔑᑲᐠ)᙮

ᐃᐃᐍ ᑲᑭᑐᑕᒪᐣ ᑭᔑᑭᑫᑕᐣ ᑲᑕᓇᓄᑭᓇᓂᐘᐠ ᓄᑕᓯᓂᑫᐏᑲᒥᑯᐠ ᑲᐏᐣ ᑎᔑᒥᓊᑕᓯᐣ, ᑭᑯᒋᑐᐣᑕᐡ ᑲᓇᓇᑕᐘᓯᓂᑫᓇᓂᐘᐠ ᐊᓄᑭᐏᐣ, ᒥᓇ ᑭᓴᑭᑐᐣ᙮ ᑯᑕᒪᑲᒥᐠ ᐁᔭᔭᔭᐣ, ᐁᓇᑲᒋᑐᔭᐣ ᐁᓇᑲᒥᑲᐠ ᐊᐦᐠᓬᐃ, ᐁᒧᓇᐦᐃᑫᔭᐠ, ᐁᓇᑲᒥᑲᐠ ᐊᐦᑭ ᑲᒪᓯᓇᑭᓯᑲᑌᐠ ᒥᓇ ᐁᐱᒧᓴᓂᐘᐠ ᑭᒥᓂᑯᐏᐢ ᒋᑭᒥᓌᔑᐠ ᐊᓄᑭᐏᐣ ᐅᐅᒪ ᐅᑭᑕᑲᒥᐠ᙮ ᒥᓇ ᑭᐸᐸᒥᔭᔭ ᐅᐅᐍᑎᓀᑫ ᑭᐍᑎᓄᐠ ᑲᓇᑕ, ᒋᐘᐸᒪᑿ ᔭᐏᔭᐠ, ᒥᑕᐦᐃ ᒋᔓᓂᔭᑫᔭᐣ ᒥᓇ ᒋᒥᓊᑕᒪᐣ᙮

ᑭᑭᐱᐅᑭᒪᑲᓂᐤ ᐃᐃᒪ ᒥᓯᓇᐱ ᒪᐡᑭᑯ ᐃᐡᑯᓂᑲᓂᐠ᙮ ᐊᓂᐣ ᑲᐃᓯᓭᐠ ᐃᐃᐍ ᑭᑕᓄᑭᐏᓂᐠ?

ᐊᐱ ᑲ ᐊᔑᑌᐱᐦᐅᑯᔭᐣ ᒋᐅᑭᒪᑲᓂᐏᔭᐣ ᒣᑿᐨ ᐊᐦᑭᐏᐣ 2001, ᑭᐏᒋᑐ ᐁᑭᐏᒋᐦᐊᑿ ᑯᑕᑭᔭᐣ ᐊᓂᔑᓂᓂᐏ ᐃᐡᑯᓂᑲᓇᐣ ᐁᐃᓇᐱᐘᐨ ᒋᑭᐏᒋᑐᐘᐨ ᐃᐃᒪ ᓄᑕᓯᓂᑫᐏ ᒪᒋᑕᐏᓂᐠ, ᑭᐏᒋᐦᐊᐠ ᒋᑌᐱᓇᒧᐘᐨ ᐏᑕᒪᑫᐏᓇᐣ ᒋᑭᐏᒋᐦᐃᑯᐘᐨ ᑲᐃᔑ ᐱᒥᑕᔑᒋᑫᐘᐨ ᑲᓇᓇᑕᐘᓯᓂᑫᓂᐨ ᒥᓇ ᓄᑕᓯᓂᑫᐏ ᒪᒋᑕᐏᓇᐣ᙮

ᑭᐏᒋᐦᐊᐠ ᒥᓇ ᒪᒋᑕᐏᓇᐣ ᒋᐅᔑᑕᒪᓱᐘᐨ ᐏᒋᐏᑎᐏᓇᐣ ᒥᓇ ᒋᐏᑕᓄᑭᒪᐘᐨ ᐊᓂᔑᓂᓂᐘᐣ ᒋᑭᒋᓀᒋᑲᑌᐠ, ᒋᐸᐸᒥᓯᓇᓂᐘᐠ ᒥᓇ ᑲᑭᓇ ᔭᐏᔭ ᒋᐅᐣᒋ ᒥᓄᓭᐘᐨ ᒪᒋᑕᐏᓂᐠ ᐊᓂ ᒪᑕᓄᑭᒋᑲᑌᐠ᙮

ᐊᓂᐣ ᐁᓇᓄᑭᔭᐣ ᐃᐃᒪ Noront?

ᑭᐊᑕᓄᑭ ᑲᐃᓇᑭᓱᔭᐸᐣ ᐊᓂᔑᓂᓂᑲᐠ ᐏᑕᓄᑭᒥᑎᐏᓇᐣ ᐁᑭᓇᑭᒥᑯᔭᐣ ᐊᓂᑫᐏ ᐅᑭᒪ, ᐅᑭᒪᐏᐣ ᐃᓯᓭᐏᓇᐣ᙮ ᑭᔭᐸᐨ ᐱᒥᑕᔑᒋᑫᒥᐣ ᐁᐸᐸᒥᓯᔭᐣ ᐃᐃᒪ ᐊᓂᔑᓂᓂᐏ ᑕᐏᓇᐣ, ᑎᔑᐸᐸᒥᐢ ᒣᑿᐨ ᒥᑕᐦᐃ ᑎᐸᐦᐃᑲᐣ ᐁᐱᒥᑕᔑᒋᑲᓂᐘᐠ ᒥᓇ ᐁᑭᒋ ᐏᒋᑲᑌᑭᐣ ᑕᔑᒋᑫᐏᓇᐣ ᑲᐃᓇᐱᐘᐨ ᐅᑭᒪᐏᓇᐣ ᐃᓂᐍᓂᐘᐣ ᐅᐣᒋ ᑲᐏᔑᒪᒋᑕᔭᐠ ᑲᐃᔑ ᑭᓂᑿᓇᑌᐠ ᐃᐡᑯᑌᐏ ᐊᐦᑭᐠ ᒪᒋᑕᐏᐣ᙮

ᒪᒪᑲᑌᑕᑯᐣ ᔭᐏᔭ ᑲᐃᔑᐯᔑᑯᐨ ᐅᐱᒪᑎᓯᐏᓂᐠ ᐅᑕᓄᑭᐏᐣ ᐁᔭᔭᐣᒋᓭᑭᐣ ᑲᓂᐊᐱᒋ ᐊᐦᑭᐘᐠ᙮ ᐁᐱᒪᓄᑭᔭᐣ ᐅᐅᒪ ᓄᑕᓯᓂᑫᐏᓂᐠ, ᑲᐏᐣ ᐏᑲ ᑲᑭᐅᐣᒋᓀᑕᓯᓇᐸᐣ ᐅᐅᐍ ᑎᓄᑲᐣ ᐊᓄᑭᐏᐣ ᒋᑭ ᐊᓂᑐᑕᒪᐣ ᐅᐅᒪ ᓄᑕᓯᓂᑫᐏᓂᐠ᙮

ᐊᓂᐣ ᐁᔑᐘᐸᑕᒪᐣ ᓄᑕᓯᓂᑫᐏᐣ ᐁᔑᐊᐣᒋᓭᐠ ᐅᑕᓇᐠ ᑲᐱ ᐊᐦᑭᐘᐠ?

ᓄᑕᓯᓂᑫᐏᐣ ᐱᔭᐣᒋᓭᐠ ᒥᑕᐦᐃ ᐊᐱ ᑲᑭᒪᑕᓄᑭᔭᐸᐣ ᑲᓂᐱᐠ ᐊᓄᑭᐏᐣ ᑭᑭᓄᒪᐘᑲᓂᐠ ᑲᐃᔑᐸᑭᓯᐠ ᐊᐦᑭ ᓄᑕᓯᓂᑫᐏᑲᒥᑯᐠ᙮ ᓄᑯᒼ ᒪᐘᐨ ᐊᐣᑿᒥᓯᒪᑲᓄᐣ ᐅᐅᒪ ᑲᓇᑕ ᒥᓇ ᐁᑲᓇᐘᐸᒋᑲᑌᑭᐣ ᐁᒪᓇᒋᒋᑲᑌᐠ ᐊᐦᑭᐏᓇᐣ ᐁᔑᐘᐸᒋᑲᑌᐠ ᒥᔑᐣ ᔭᐏᔭᐠ ᒪᐘᐨ ᐁᒥᓌᔑᐠ ᒥᓯᑌᑲᒥᐠ᙮ ᒥᓇ ᐁᑭᒋᓀᑕᑯᐠ, ᓄᑕᓯᓂᑫᐠ ᐅᓂᑲᓂᐡᑲᓇᐘ ᑲᐃᔑ ᑲᑵᐏᒋᐘᑲᓀᐘᐨ, ᒋᐏᑕᒪᐘᑲᓀᐘᐨ ᒥᓇ ᒋᐏᒋᐘᑲᓀᐘᐨ ᐊᓂᔑᓂᓂᐘᐠ ᑲᐃᔑ ᐱᒪᓄᑭᒋᑲᑌᐠ ᐃᐃᐍ ᓄᑕᓯᓂᑫᐏ ᒪᒋᑕᐏᓇᐣ ᑲᒪᑕᓄᑭᒋᑲᑌᑭᐣ᙮

ᒥᓂᑯᐠ ᐁᐸᐸᒥᓯᔭᐣ ᐅᐅᐍ ᓄᑕᓯᓂᑫᐏᐣ ᐅᐣᒋ ᐊᐘᔑᒣ 40 ᑕᓱ ᐊᐦᑭ᙮ ᑭᒋᓀᑕᐣ ᐁᐘᐸᑕᒪᐣ ᑲᐱᔑᑲᓇᐘᐸᒋᑲᑌᐠ ᐁᓂᑲᓂᐡᑭᑲᑌᐠ ᐃᐃᐍ ᑲᑐᒋᑲᑌᐠ ᑎᓄᑲᓇᐣ ᐱᒪᑎᓯᐏᓂᐠ, ᐊᐦᑭᐏ ᓇᑲᒋᒋᑫᐏᓂᐠ ᒥᓇ ᒥᓄᔭᐏᓂᐠ ᑲᔦ ᐊᐣᑿᒥᓯᐏᓂᐠ᙮ ᑎᔑᑌᐻᑕᐣ ᐃᓂᐍᓂᐘᐣ ᐊᓂᔑᓂᓂᐘᐠ ᑲᐃᓀᑕᒧᐘᐨ ᐁᐸᑭᑎᓂᑎᓱᐘᐨ ᒋᐏᒋᑐᐘᐨ ᓄᑕᓯᓂᑫᐏᐣ ᐅᑲᐘᐸᑕᓇᐘ ᒋᒥᓄᓭᐘᐨ ᒋᔑᒥᑲᒧᐘᐨ ᐅᑕᓂᔑᓂᓂᒥᐘ ᑿᔾᐠ ᒋᔑᑎᐸᐦᐊᒪᐘᑲᓀᐘᐨ ᐅᑕᓄᑭᐏᓂᐘ, ᒋᑭᑭᓄᒪᐘᑲᓀᐘᐨ, ᒪᒋᑕᐏᓇᐣ ᑲᐅᓇᒋᑲᓂᐘᐠ ᒥᓇ ᒋᐱᒥ ᐏᒋᐦᐊᑲᓀᐘᐨ ᑲᑭᓇ ᑲᐃᔑᓇᑯᑭᐣ ᐃᐡᑯᓂᑲᓂᐠ ᒪᒋᑕᐏᓇᐣ ᒥᓇ ᐃᔑᒋᑫᐏᓇᐣ᙮