ᓈᕒᐊᐣᐟ ᑭᑭᐅᑌ ᐘᐱᔐᓯ ᐸᐏᑎᑯᐣᐠ

ᓂᐣ ᒫᕒᐊᔭ ᐸᑭᐢᑐᕒ, CCLO, MFFN

ᒣᑿᐨ ᓄᐯᒼᐳᕒ 2017, ᐊᓄᑭᓇᑲᓇᐠ ᐁᑭᐅᐣᒋᐘᐨ ᓈᕒᐊᐣᐟ ᒪᒋᑕᐏᐣ ᑭᑭᐅᑌᐘᐠ ᐘᐱᔐᓯ ᐸᐏᑎᑯᐣᐠ ᒋᓇᑭᐡᑲᐘᐘᐨ ᐊᓂᔑᓂᓂᐘᐣ, ᐅᑭᒪᑲᐣ ᒥᓇ ᐅᑭᒪᔑᔕᐠ, ᑲᐏᒋᐦᐃᐍᐨ ᑲᓯᒼ ᑲᑎᐠ ᒥᓇ ᑲᐏᒋᐦᐃᐍᐨ ᓬᐋᕒᐁᐣᐨ ᐸᑭᐢᑐᕒ᙮

ᒪᕒᐃᔭ ᐸᑭᐢᑐᕒ

ᐁᑭᑕᔑᒪᒪᐤᐱᓇᓂᐘᐠ ᐃᐃᒪᓀᑫ ᐦᐁᓄᕒᐃ ᑯᐢᑐᕒ ᑭᑭᓄᒪᑎᐏᑲᒥᑯᐠ ᑲᑕᔑᑕᔑᑲᓂᐘᐠ ᐁᑭᒪᒪᐏᓇᓂᐘᐠ ᐁᑭᑎᐸᒋᒧᓇᓂᐘᐠ ᐁᐣᑐᒋᑲᑌᐠ ᐃᐃᒪ ᑲᑭᓂᑿᓇᑌᐠ ᐃᐡᑯᑌ ᐊᐦᑭᐠ ᐁᑭᑎᐸᒋᒧᐨ ᐊᓯᐣ ᐃᓂᓂ ᐅᑭᒪ᙮ ᐃᐃᐍ ᒪᒪᐤᐱᐏᐣ ᐅᑭᓂᑲᓂᐡᑲᐣ ᐊᐊᐍ ᓅᕒᐊᐣᐟ ᐅᑭᒪᐏᒪᒋᑕᐏᓇᐣ ᐢᑎᑊ ᐱᓬᐅᐍᓬᐃᐣᐠ ᐁᑭᐏᑕᑭᐣ ᒪᒋᑕᐏᐣ ᐅᑕᓄᑭᐏᓇᐣ ᒥᓇ ᐁᑭᐏᑕᐠ ᐁᐱᒋ ᑭᒋᓀᑕᑯᐠ ᒋᑭᑕᑯᓇᑲᓀᐘᐨ ᐊᓂᔑᓂᓂᐘᐠ ᐃᐃᒪ ᐊᓄᑭᐏᓇᐣ ᑲᑐᑕᒧᐘᐨ᙮

ᑭᐸᑭᓂᑲᑌ ᒋᒪᒋᑕᔑᐣᒋᑲᑌᐠ ᐊᓂᔑᓂᓂᐘᐠ ᐁᑭᑲᑵᑌᐘᐨ ᐁᑯᓀᓇᐣ ᐊᓄᑭᐏᓇᐣ ᐁᔭᔭᑭᐣ ᒥᓇ ᐊᓂᐣ ᑫᑭᑐᑕᒧᐘᐨ ᒋᑭᑌᐱᓇᓄᐘᐨ ᐊᓄᑭᐏᐣ ᐃᐃᒪ ᒪᒋᑕᐏᓂᐠ᙮ ᐢᑎᑊ ᑭᑭᑐ ᓅᕒᐊᐣᐟ ᐅᑭᐅᑎᓇᐣ ᐊᓄᑭᓇᑲᓇᐣ ᑎᓄᑲᐣ ᓇᓇᑲᒋᒋᑫᐏ ᐊᓯᓂᑫᐏᐣ, ᑲᐯᔑᐏᐣ ᑲᐏᒋᑐᐘᐨ, ᑲᑕᐏᑲᐦᐃᑫᐘᐨ, ᑲᒧᓇᐦᐃᑲᓂᐘᐠ ᑲᐏᒋᑐᐘᐨ ᒥᓇ ᑲᑭᔑᑌᐳᐘᐨ/ᒪᐡᑭᑭᐏᓂᓂ ᐊᓄᑭᐏᓇᐣ ᐁᑭᐅᑎᓇᑲᓀᐘᐨ ᐃᐃᒪᓀᑫ ᐘᐱᔐᓯ ᐸᐏᑎᑯᐠ ᒥᓇ ᐍᐱᑵᐠ ᑕᔑᑫᐏᓇᐣ ᐁᐏᒋᑲᓱᐘᐨ ᑎᓄᑲᐣ “ᒪᐘᐨ ᓂᑕᒼ” ᐊᓄᑭᓇᑲᓇᐠ᙮ ᑭᐡᐱᐣ ᐊᓄᑭᐏᐣ ᐁᑲ ᐁᑭᐅᑎᓇᑲᓀᐨ ᐃᐃᒪ ᑲᐃᔑ ᓂᑲᓇᒋᑲᑌᑭᐣ ᑕᔑᑫᐏᓇᐣ ᒋᐅᑎᓇᑲᓀᐨ ᐊᓄᑭᓇᑲᐣ, ᑲᑭᑫᑕᒧᐘᐨ ᐊᓄᑭᐏᓂᓂ ᐊᓄᑭᓇᑲᓇᐠ ᐅᑕᐱᓇᑲᓀᐘᐠ ᑯᑕᑭᑲᐠ ᑕᔑᑫᐏᓇᐣ᙮

ᐯᔑᐠ ᑭᒋᔭᔭ ᑭᑲᑵᑌ ᐁᑯᓀᐣ ᓅᕒᐊᐣᐟ ᐁᑲ ᐍᒋᑭᐍᐅᔑᑐᐨ ᓀᐘᐣᑯᐏ ᐳᓂᐏᑲᒥᐠ ᐃᐃᒪ ᑲᑕᔑᓄᑕᓯᓂᑫᐘᐨ᙮ ᑭᐏᒋᑲᑌ ᐅᐣᓴᒼ ᒥᑕᐦᐃ ᒋᒣᑎᓂᑲᓂᐘᐠ ᒋᑭ ᑿᔭᐠ ᒋᐅᔑᒋᑲᑌᐠ ᒋᑭᐳᓂᒪᑲᑭᐣ ᐱᒥᓭᐏᓇᐣ ᐃᐃᐍ ᒣᑿᐨ ᑲᓇᓇᑕᐘᓯᓂᑫᓇᓂᐘᐠ᙮

ᓅᕒᐊᐣᐟ VP ᑲᓇᓇᑕᐘᓯᓂᑫᓇᓂᐘᐠ ᕒᐋᔭᐣ ᐍᐢᑕᐣ ᑭᑎᐸᒋᒧ ᑲᐃᓇᑲᒥᑲᐠ ᐊᐦᑭᐤᒪᓯᓇᐦᐃᑲᓇᐣ ᒥᓇ ᐊᓯᓂᐠ ᑲᓇᑯᓯᐘᐨ ᐃᐃᒪᓀᑫ ᐱᓀ ᒪᒋᑕᐏᓂᐠ ᒥᓇ ᒪᐠᐹᓬᑎᐢ ᐊᑭᑕᓱᐣ 8, ᐁᑭᔑᐏᑕᒪᑫᐨ ᒪᐘᐨ ᒥᑕᐦᐃ ᐁᑭᒥᑭᑲᓂᐘᐠ ᒥᓇ ᐁᐃᔑᓇᑯᐠ ᒪᐘᐨ ᐁᒥᓄᔑᔑᐨ ᐊᓯᐣ ᐃᐃᒪ ᑲᐃᔑᐱᒪᐱᑫᔑᓄᐘᐨ ᐊᓯᓂᐠ ᒥᓇ ᐃᐃᐍ VMS (ᐊᓇᒪᑲᒥᐠ ᐃᐡᑯᑌᐏᐊᓯᓂᑫᐏᓇᐣ) ᑲᐃᔑᐊᐱᐨ ᐊᐱ ᒧᓇᐦᐃᑲᓂᐘᐠ᙮ ᐅᑭᑕᔑᐣᑕᐣ ᓅᕒᐊᐣᐟ ᐅᑐᓇᒋᑫᐏᐣ ᐊᐘᔑᒣ ᒋᓇᓇᑲᒋᒋᑲᓂᐘᐠ ᐃᐃᒪ ᒪᐠᐸᓬᑎᐢ ᐊᐦᑭᐏᓂᐠ ᒥᓇ ᐁᑭᑭᑐᐨ ᐃᓂᐍᓂᐘᐣ ᑲᐅᐡᑭ ᒥᑭᑲᑌᑭᐣ ᒋ ᐃᔑᓂᑲᒋᑲᓂᐘᐠ ᐊᐊᐍ ᐱᓀᔑᐡ᙮ ᑲᐃᐡᑿ ᒪᒪᐤᐱᓇᓂᐘᐠ, ᓅᕒᐊᐣᐟ ᐅᑭᑐᑕᓇᐘ ᐁᑭᒪᒪᐤᐱᐦᐊᐘᐨ ᐊᓂᔑᓂᓂᐘᐣ ᐅᑌᓇᐠ ᑲᑲᐯᔑᓂᐨ ᐃᐃᒪ ᑕᐣᑐᕒ ᐯ ᒣᑿᐨ ᑎᓭᒼᐳᕒ 14, 2017᙮