ᐊᓄᑭᓇᑲ ᐅᑎᐸᒋᒧᐎ- ᐌᐃ ᔕᑲᓇᑴ

ᐃᔑᓂᑲᓱᐎᐣ:
ᐌᐃ ᔕᑲᓇᑴ

ᐃᐡᑯᓂᑲᐣ:
ᐌᐱᑴ ᐃᑯᓂᑲᓂ

ᑭᑕᓄᑭᐎᐣ:
ᑲᒧᓇᐦᐃᑫ ᐁᐎᒋᐗ Cyr ᒧᓇᐦᐃᑫᐎ

 

ᐊᓂ ᐁᑐᑕᒪ?

ᐃᐃᒪ ᑎᔑᐊᓄᑭ Cyr ᑲᐃᔑᒧᓇᐦᐃᑲᓂᐗ ᐁᓇᓄᑭᔭ ᐊᓯᓂᑫᐎ/RC (ᑲ ᐊᔐᒧᓇᐦᐃᑲᓂᐗ) ᒧᓇᐦᐃᑫᐎ ᒥᓇ ᒧᓇᐦᐃᑫᐎ ᑲᐎᒋᐦᐃᐌ᙮ ᒥᓇ ᑲᔦ ᑎᓇᓄᑭ ᐁᐱᐗᐱᑯᑫᔭ ᒥᓇ Type 1 & 2 ᐊᓇᒪᑲᒥ ᒧᓇᐦᐊᓯᓂᑫᐎ᙮ ᑲᐃᓇᓄᑭᔭ ᐁᐎᑕᓄᑭᒪᑾ ᑲᓂᑲᓂᑲᒧᐗ ᐊᓄᑭᐎᓇ ᑲᒪᒋᒋᑲᑌᑭ ᐁᓇᑲᒋᑐᔭ ᐁᓇᐱᓇ ᑲᒧᓇᐦᐃᑫᒪᑲ ᒥᓇ ᑲᒧᓇᐦᐃᑲᓂᐗ ᐁᐎᒋᑐᔭ ᐊᐱ ᐊᓄᑭᐎᓇ ᑲᒪᑕᓄᑭᒋᑲᑌᑭ᙮

ᑭᑭᐱᐊᓄᑭᑕᐗ ᓇ Noront?

ᐁᐦᐊ, ᑭᐱᐊᓄᑭ ᓄᐱᒪᑲᒪᐃ ᐁᑭᐎᒋᑐᔭ ᒣᑾ ᑲᑭᑭᐱᒋᔭ ᑲᒧᓇᐦᐃᑲᓂᐗ᙮ ᑭᒥᓉᑕ ᐃᐃᒪ ᑲᑭᔑᑲᐯᔑᔭ ᐁᑯᕒ ᑲᐯᔑᐎᓂ, ᐁᐎᒋᐗᑾ ᔭᐎᔭ ᑲᑭᑫᓂᒪᑾ ᒥᓇ ᐁᑕᓇᓄᑭᔭ ᐯᔓ ᑲᐃᔑᑕᔭ ᐌᐱᑴ᙮

ᐊᓂ ᑲᑐᑕᒪ ᑲᑭᒪᒋᑕᔭ ᒋᒧᓇᐦᐃᑫᔭ/ᒋᓄᑕᓯᓂᑫᔭ?

ᑲᑭᒪᒋᑕᔭ ᑭᑭᓯᓇᑲᓀ/ᑲᑭᔑᑌᐳ ᐁᑭᐎᒋᐦᐊ᙮ ᑲᑭᓋ ᑎᐸᒋᒧᐎ ᒋᒐᑾᑐᔭ, Noront ᑲᐯᔑᐎ ᑲᓂᑲᓂᑲ, ᕒᐋᓬ ᒪᓇᓬᐃ, ᑭᐎᒋᐦᐃ ᒋᒧᓇᐦᐊᓯᓂᐌᔭ ᑲᑭᑭᓄᒪᑫᓇᓂᐗ ᑲᑭᐸᑭᑎᓇᒧᐗ ᐅᑌᕒᐃᔪ ᐅᑭᒪᐎ ᑭᑭᓄᒪᑫᐎᓇ᙮ ᒥᐦᐅᒪ ᑲᐅᒋᔭᔭᔭ, ᐁᑯ ᓂᒥᓉᑕ ᐃᐃᐌ ᑲᑭᔑᐎᒋᐦᐃᔑ ᒥᓂᑯ ᒥᓇ ᐅᐅᐌ ᑲᑭᔑᑲ᙮

ᑭᐃᔕ ᐃᐃᒪ ᑭᐌᑎᓄ ᒀᓬᐃ ᑭᑭᓄᒪᑎᐎᑲᒥᑯ ᐃᐃᒪ ᑯᕒᓬᐊ ᓴᑲᐦᐃᑲᓂ ᐁᑭᑐᑕᒪ ᐅᑭᑕᑲᒥ ᒧᓇᐦᐃᑫᐎ ᐎᒋᐦᐃᐌᐎ ᑭᑭᓄᒪᑫᐎ᙮ ᑭᑭᑭᓄᒪᑯ ᐁᑐᒋᑲᑌ ᑲᒧᓇᐦᐃᑲᓂᐗ ᐊᓯᓂᑲ ᒥᓇ ᐁᑭᐸᐸᒪᓄᑭᔭ ᑲᑭᔑᐊᓯᑯᔭ ᐁᑭᒪᒋᑕᔭ ᓄᑕᓯᓂᑫᐎᓂ᙮ ᒥᓇ, ᑭᐊᓂᑐᑕ ᑲᑭᐌᐱᑌ ᒧᓇᐦᐃᑫᐎ ᐃᐃᒪ ᑴᐯ ᒥᓇ ᑭᐌᑎᓄ ᓬᐊᐳᕒᑑᕒ᙮ ᑭᐎᒋᑐ ᐁᑭᒪᒋᑕᔭ ᒥᓇ ᑭᐊᓂᐊᑕᓄᑭ ᒋᒧᓇᐦᐃᑫᔭ᙮ ᒥᓇ ᐃᐃᐌ ᑲᑭ ᐃᑾᑐᑕᒪ ᑭᑭᑭᓄᒪᑯ ᐊᓇᒪᑲᒥ ᓄᔭᓯᓂᑫᐎ ᐊᓄᑭᐎ ᑭᑭᓄᒪᑎᐎᑲᒥᑯ ᐅᐅᒪ ᐅᑌᕒᐃᔭ ᐁᑭ ᐊᓂᑐᑕᒪ ᐃᐃᐌ Type 1 & 2 ᓄᑕᓯᓂᑫᐎ ᐃᐃᒪ ᐯᓬ ᐊᓯᓂᑫᐎᑲᒥᑯ᙮

ᐊᓂ ᐁᔑᓇᑯ ᑭᑭᔑᑲ ᒣᑾ ᑲᐃᓇᓄᑭᔭ?

ᑲᒪᒋᑕᔭ ᑐᑕᒥ ᐎᑕᒪᑫᐎᓇ ᒪᒪᐤᐱᐎᓇ ᒥᓇ ᐎᒋᑲᑌᐗ ᑫᑐᒋᑲᑌᑭ ᐊᓄᐃᐎᓇ᙮ ᑐᑕᓇ ᐁᓇᑲᒋᑐᔭᓇ ᐊᐸᒋᒋᑲᓇ, ᓇᑲᒋᒋᑫᐎᓇ ᒥᓇ ᑫᐃᔑᒥᓄᓭᑭ ᐊᐸᒋᒋᑲᓇ ᐱᒥᑌ ᒥᓇ ᐁᒪᒋᐱᒋᑲᑌᑭ᙮ ᒋᐸᒥᓇᒪ ᒥᓇ ᐗᓯᑲᓂᐱᒥᑌ ᒥᓇ ᑲᐱᒥᐎᓇᑲᓀᐗ ᐊᓯᓂ ᒋᑭᓯᓂᑲᑌᑭ ᒥᓇ ᑲᒧᓇᐦᐃᑫᒪᑲᑭ ᐊᐸᒋᒋᑲᓇ᙮ ᓂᓇᑲᒋᐦᐊᒥ ᒥᓇ ᐊᓯᓂ ᑲᒧᓇᐦᐃᑲᓱᐗ ᐁᑲ ᒋᒪᒋᓇᑯᓯᐗ ᐃᐃᒪ ᐊᓯᓂ ᐗᑲᐦᐃᑲᓂ᙮ ᑭᒋᐊᓄᑭᓇᓂᐗ ᒋᐸᒥᓂᑲᑌ ᒋᒥᓄᓭ ᑲᒧᓇᐦᐃᑲᓂᐗ ᐊᓄᑭᐎ᙮

ᐁᑯᓀ ᐗᐎᑕᒪ ᒋᑭᑫᑕᒧᐗ ᔭᐎᔭ ᐃᐃᐌ ᑭᑕᓄᑭᐎ?

ᑲᑭᑲᒋᓂᔕᐦᐋ ᔭᐎᔭ ᒋᑭᑐᑕᒧᐗ ᑲᒧᓇᐦᐃᑲᓂᐗ ᐊᓄᑭᐎᓇ ᐃᐃᒪ ᑲᑕᔑᑭᑭᓄᒪᑫᓇᓂᐗ ᓄᑕᓯᓂᑫᐎ ᐊᓄᑭᐎᓇ᙮ ᐊᓂ ᓂᑲᓂᑭᑲᑌ (ᑭᐱ ᑲᔦ ᐎᐸᐸᒥᔭᔭ ᐅᐅᐌ ᑲᐃᔑᓇᑯ ᒥᓯᑌᑲᒥ)᙮ ᒥᔑᓉ ᑭ ᐃᔕ ᒥᓇ ᑭᐗᐸᒋᑫ ᒥᔑ ᐃᓇᑎᓯᐎᓇ ᑲᐃᓇᑲᓀᔭᑭ᙮ ᑭᐃᔕ ᒥᓇ ᐗᐸᓄ ᒥᓇ ᓀᑲᐱᐦᐅᓄ ᐅᐅᒪ ᑲᓇᑕ ᐁᑭᐗᐸᑕᒪ ᑭᒋᑲᒥ ᑲᐃᔑᓇᑯᑭ᙮ ᑲᐎ ᐎᑲ ᑲᐃᑾᑭᑫᑕᓱᓯ ᑐᑕᒪ ᓄᑕᓯᓂᑫᐎ ᒥᓇ ᒥᔑ ᑫᑯᓇ ᑫᑭᓇᑲᒋᑐᔭᓂ᙮

ᐁᑯᓀ ᐃᐃᐌ ᒪᐗ ᑲᑭᒋᓀᑕᒪ ᐃᐃᒪ ᑭᑕᓄᑭᐎᓂ?

ᐃᐃᐌ ᑲᐃᑭ ᑲᐸᐸᒥᔭᔭ ᒥᓇ ᐁᑲᑭᑐᔭ ᒋᐸᒥᓇᒪ ᑲᐃᔑᐯᔑᑯᔭ ᒧᓇᐦᐃᑫᐎ ᐊᐸᒋᒋᑲ᙮ ᓂᒥᓉᑕ ᒥᓇ ᔭᐎᔭ ᑲᐗᐸᒪᑾ ᒥᓇ ᐁᓇᑲᒋᐅᔭᓇ ᐯᐸᑲ ᓄᑕᓯᓂᑶᓇ ᒪᒋᑕᐎ ᑲᐃᔑᐸᑭᑎᓇᒧᐗ ᐊᓄᑭᐎᓇ ᑲᐯᐸᑲᓂᓇᑯᑭ ᐃᐃᒪ ᓄᑕᓯᓂᑫᐎ ᐊᓄᑭᐎ᙮

ᐁᑯᓀ ᑲᐯᐦᐃ ᒪᒋᐎᑐᔭ ᑲᒪᑕᓄᑭᔭ?

ᓂᒪᒋᐎᑐᓇ ᑲᑭᑭᑲᒪᓇ ᐊᐸᒋᒋᑲᓇ ᑫᓇᑕᐌᑕᒪ ᒋᑭᑐᑕᒪ ᐯᔑᑯᑭᔑᑲ ᑕᓄᑭᐎ ᐁᑲ ᒋᒪᓯᓭᔭ᙮ ᒋ ᐊᑾᒥᓯᔭ ᒪᐗ ᓂᑲᓇᑌ ᑭᐱ ᐅᐅᐌ ᐎᑐᑕᒪ ᐊᓄᑭᐎ, ᐁᒥᔑᓇᑭ ᑫᐅᒋ ᒪᓯᓭᔭ ᒣᑾ ᐊᓄᑭᔭ ᔕᑯ ᑭᐱ ᑾᔭ ᓇᑲᒋᑐᔭ ᑭᑕᐸᒋᒋᑲᓇ, ᑲᐎ ᑲᑭᒪᓯᓭᓯ᙮ ᐃᐃᐌᑕ, ᑭᒥᓉᑕ ᐅᐅᐌ ᑲᐃᓇᒋᒧᔭ ᑲᐃᔑᒥᑲᒪ ᐊᓄᑭᐎ ᒥᓇ ᑲᐃᔑᑲᑭᐦᐅᔭ᙮ ᒥᑴ!!