ᐊᐸᒋᐊᑲᐣ ᐅᑎᐸᒋᒥᑯᓯᐧᐃᐣ – ᐧᐁᔾᐣ ᓴᐧᑲᓂᐧᑫᑊ

ᐊᐸᒋᐊᑲᐣ:
ᐧᐁᔾᐣ ᓴᐧᑲᓂᐧᑫᑊ

ᐃᑕᐧᐃᐣ ᑲ ᐅᒋᐟ:
ᐧᐁᐱᐧᑫ ᐅᒋᐤ

ᐁᑕᐸᑎᓯᐟ:
ᑲᐯᐯᐧᑲᑕᐃᑫᓂᒋ ᓭᕐ ᑲ ᐃᑎᒥᒋ ᐧᐃᒉᐧᐁᐤ

 

ᑕᓀᑐᑕᒪᐣ ᑲ ᐃᔑ ᐊᐸᑎᓯᔭᐣ?

ᑲ ᐃᔑ ᐯᐯᐧᑲᑕᐃᑲᓂᐧᐊᐠ ᓂᑎᔑ ᐊᐸᑎᓯᐣ ᐯᐡᑭᐡ ᐁ ᑭᐢᑭᓄᐊᒪᓱᔭᐣ ᒥᓭᐧᐁ ᐱᑯ ᑕᐃᓇᐸᑎᓯᐣ ᓀᐢᑕ ᐁᐧᐃᒋᐊᐸᑎᓯᒪᐠ ᑲ ᐅᑭᒪᐧᐃᐟ ᐁᑭᐢᑭᓄᐊᒪᓱᔭᐣ ᐁᑐᒋᑲᑌᑭ ᑫᐧᑲᓇ ᑲ ᐃᔑ ᐊᐸᑎᓯᓇᓂᐧᐊᐠ᙮

ᑭᑭ ᐊᐸᒋᐊᐤ ᓇ ᐧᐃ ᐧᐃᐢᑲᐨ ᓄᐧᕋᐣᐟ?

ᐁᐁᐠ ᓂᐧᐃᒋᐊᑕᔾ ᒪᓇ ᑲ ᐅᑭᒪᐧᐃᐟ ᓂᑭᒥᐧᓀᓂᑌᐣ ᐅᒪ ᐁᑭ ᐃᓇᐸᑎᓯᔭᐣ ᓀᐢᑕ ᐁ ᑭᐧᐊᐧᐃᒋᐧᑕᔭᐣ ᑲᑦᐱᐠ ᓂᑭ ᒥᐧᓀᓂᑌᐣ ᐁᐯᔑᓇᐧᑲᐠ ᑲ ᐅᒋᔭᐣ

ᑕᐣᑌ ᐧᐁᒋ ᑭ ᐊᑎ ᐯᐯᐧᑲᑕᐃᑫᔭᐣ ᑭᒋ ᑭ ᐃᓇᐸᑎᓯᔭᐣ?

ᐅᐡᑲᐨ ᐊᓂ ᒪᓇ ᐱᑯ ᓂᒧᒋᑲᓯᓇᑲᓇᑕᔾ ᑫᑲ ᒪᑲ ᐱᑯ ᓂᑭ ᐊᑎ ᑭᐢᑭᓄᐊᒪᑲᐧᐃᐣ ᑭᒋ ᑭ ᐯᐯᐧᑲᑕᐃᑫᔭᐣ ᐊᐢᑭᐠ ᓀᐢᑕ ᒪᑲ ᓂᑭ ᑭᐢᑭᓄᐊᒪᓱᐣ ᑭᒋ ᐅᑭᒪᐤ ᑲᑎᐸᐊᐠ ᐁᑭᐢᑭᓄᐊᒪᓱᐧᐃᐟ

ᑯᐠᑲᑌᐣᓓᐠ ᓂᑭ ᐃᔑ ᑭᐢᑭᓄᐊᒪᓱᐣ ᐁᑐᒋᑲᑌᐠ ᑕᐃᒪᐣ ᐊᓯᓂᔾ ᐁᐯᐯᐧᑲᑕᐃᑲᓂᐧᐊᐠ ᐁᓇᓇᑐᓂᐟ᙮ ᒥᑐᓂ ᑕᐧᐯ ᓂᑭ ᒥᓯᐧᐁ ᓂᑭᐃᑐᑕᐣ ᐁᓇᐃᐸᓂᐠ ᑭᒋ ᐸᐸᔭᐸᑎᓯᔭᐣ ᓀᑌ ᓀᐢᑕ ᐧᐊᐸᓄᐠ ᐃᑌᑫ ᓀᐢᑕ ᐊᑕᒥᐠ ᐊᐢᑭᐠ ᐃᑌᑫ ᐁ ᑭ ᐃᔑ ᐊᐸᑎᓯᔭᐣ ᓀᑌ ᓀᐢᑕ ᐯᓪᒪᐣ ᑲ ᐃᒋᑲᑌᐠ ᓂᑭᐃᑕᐣ ᓀᐢᑕ ᐁ ᑭ ᐅᑎᓇᒪᐣ ᓂ ᑭᐢᑭᓄᐊᒪᓱᐧᐃᐣ

ᑫᐧᑲᐣ ᒪᑲ ᒪᓇ ᑌᐊᐢᑕᑲᑌᓂᑕᒪᐣ?

ᒪᐧᐊᒋ ᓂᐢᑕᑦ ᒪᓇ ᓂᓇᑭᐡᑲᑐᓇᐣ ᒥᓯᐧᐁ ᑫᐧᑲᐣ ᐊᔭᐧᑲᒥᓯᐧᐃᓂᐠ ᐅᒋ ᓇᓇᑲᐤ ᑫᐧᑲᓇ ᑲ ᐃᓇᐸᑕᑭ ᓀᐢᑕ ᒪᑲ ᐁᑐᒪᐃᑲᑌᑭ ᐊᐸᒋᑕᐧᐃᓇ ᓀᑊᑕ ᑫᐧᑲᓇ ᑲ ᐃᔑ ᐊᐢᑌᑭ ᐁ ᐃᔑ ᓇᓇᑲᒋᑕᔭᐣ ᐊᓂᒪᐣ ᐅᒪ ᐁ ᐃᓇᐸᑎᓯᓇᓂᐧᐊᐠ ᐁ ᐊᓂᒣᓂᑕᐧᑲᐠ ᐊᔭᐧᑲᒥᓯᐧᐃᐣ ᐁᓇᓇᑲᑕᐧᐁᓂᒋᑲᑌᐠ᙮

ᑫᐧᑲᓂᐤ ᐧᐊᐧᐃᑕᒪᐧᐊᒋᐠ ᐊᐧᐁᓂᑲᓇᐠ ᑭᑕᐸᑎᓯᐧᐃᓂᓂᐤ ᐅᒋ?

ᓂᐧᐃᔑᑭᒪᐧᐊᐠ ᐊᐧᐁᓂᑲᓇᐠ ᑭᒋ ᓇᓇᑕᐧᐃ ᑭᐢᑭᓄᐊᒪᓱᒋᐠ ᑲ ᐃᔑ ᑭᐢᑭᓄᐊᒪᑲᓂᐧᐊᓂᓂᐠ ᐁᐯᐯᐧᑲᑕᐃᑲᓂᐧᐊᓂᓂᐠ ᙮ ᓀᐢᑕ ᒪᑲ ᑲᑕ ᓇᐃᐸᓂᐧᐊᐠ ᑭᒋ ᑭᐸᐸᓂᒋᐠ ᑯᑕᑭᐠ ᑭᒋ ᐃᑐᑌᒋᐠ ᐃᑕᐧᐃᓇ ᑭᒋ ᐧᐊᐸᑕᑭᐠ ᑯᑕᑭᐠ ᐊᐢᑭᐠ᙮ ᓂᓇ ᐧᐃᓇ ᐊᔕᔾ ᑭᒋ ᒥᒉᐧᑕᔦᐠ ᑕᐃᑐᑕᐣ ᑭᒋ ᐧᐊᓄᐤ ᒪᐣᑌᐧᐊᐢᑭᐠ ᐁᐧᐊᐸᒪᑭᐠ ᑯᑕᑭᔭᐠ ᑲ ᐃᔑ ᐱᒪᑎᓯᒋᐠ ᑲ ᐃᑕᐢᑲᓀᓯᒋᐠ᙮ ᐊᔕᔾ ᔕᐧᐸᐢᑲᒥᐠ ᓂᑭ ᐸᐸᐊᐸᑎᓯᐣ ᓇᑲᐯᐊᓄᐠ ᓀᐢᑕ ᐧᐊᐸᓄᐠ ᑲᑭᓇᐤ ᐁ ᐃᑕᐤ ᑭᒋᑲᒥᔭ ᐁᑭᐧᐊᐸᑕᒪᐣ᙮ ᒧᓇ ᐃᐡᐧᑲᐸᓂᐤ ᑭᒋ ᐧᐊᐸᑕᒪᐣ ᐅᒪ ᑐᐧᐃ ᐊᐸᑎᓯᐧᐃᐣ᙮

ᑫᐧᑲᐣ ᒪᐧᐊᐨ ᑲ ᐃᐡᐸᑭᑕᒪᐣ ᑭᑕᐸᑎᓯᐧᐃᓂᐠ?

ᑲᐸᐸᑭᒋᐸᓂᔭᐣ ᒪᓇ ᓀᐢᑕ ᒪᑲ ᓂᓇ ᑎᐱᓇᐧᐁ ᐁᓄᒋᑕᔭᐣ ᑲᐯᐧᑲᑕᐃᑲᑫᔭᐣ᙮ ᓀᐢᑕ ᒥᒉᐟ ᐁᓇᑭᐡᑲᐧᐊᑭᐠ ᐱᑐᐡ ᐊᐧᐁᓂᑲᓇᐠ ᓀᐢᑕ ᓇᓇᑲᐤ ᒧᓇᐃᑫᐧᐃ ᐊᑐᐢᑫᐧᐃᓇ ᒧᓇ ᐃᐡᐧᑲᐸᓂᐤ ᐅᒪ ᐊᐸᑎᓯᐧᐃᐣ᙮

ᑫᐧᑲᐣ ᒪᓇ ᑕᔑᓀ ᑫᑐᑕᑕᔭᐣ ᐁ ᐊᐸᑎᓯᔭᐣ?

ᑎᐱᓇᐧᐁ ᐣᑕᔭᓇ ᑭᑐᑕᑕᐣ ᑫ ᑭ ᐧᐃᒋᐃᑯᔭᐣ ᓂᑕᐸᑎᓯᐧᐃᓂᐠ᙮ ᓇᐢᐱᐨ ᓇᑕᐧᐁᓂᑕᐧᑲᐣ ᑭᒋ ᓇᓇᑲᒋᑕᔭᐣ ᐸᔑᓀᐧᐃᓂᐠ ᐃᑌᑫ ᐁᐧᑲᓂ ᐁᔑᓇᐧᑲᐠ ᐅᒪ ᐊᐸᑎᓯᐧᐃᐣ ᒥᒉᑎᐧᓇ ᑫᐧᑲᓇ ᑲᓇᓀᑌᓂᑕᐧᑲᑭ ᐁᐧᑲᓂ ᒪᑲ ᐧᑲᔭᐢᐠ ᑲ ᐅᒋ ᓇᓇᑲᒋᑕᓂᐧᐊᐠ ᑭᒋ ᐊᐧᑲᒥᓯᓇᓂᐧᐊᐠ ᓂᒥᐧᓀᓂᑌᐣ ᐁᑎᐸᑐᑕᒪᐣ ᓂᑕᑐᐢᑫᐧᐃᐣ ᑲ ᐃᔑ ᒥᓄᐸᓂᐃᑯᔭᐣ᙮ ᒥᐧᑫᐨ᙮