ᐊᐗᓀᓐ ᑭᐅᑌᒡ ᐁᔅᑯᕐ ᑲᐯᔑᐎᓂᒃ?

ᓂᓐ ᐊᓚᓐ ᑳᐅᑦᔅ, ᐅᑭᒪ

ᐊᑯᑭᒃ ᒥᓇ ᐌᐱᑴ ᐊᓂᔑᓇᐯᒃ ᐁᑭᐱᑭᐅᑌᐗᒡ ᒣᑾᒡ ᐋᑲᔅᑦ

Noront ᐅᑐᑕᓇᓐ 15-20 ᑭᐅᑌᐎᓇᓐ ᐁᑕᓱ ᐯᔑᒃ ᐊᐦᑭᐗᒃ, ᐊᓂᓐᑕ ᐁᑕ ᐯᔑᑯᑭᔑᑲ ᒥᓇ ᑯᑕᑭᔭᓐ ᒥᔑᓄ ᑕᓱᑕᐗᑌ᙮ ᐁᑯ, ᐊᐗᓀᓇᒃ ᑲᐱᑭᐅᑌᐗᒡ ᑲᐯᔑᐎᓂᒃ ᐃᐃᒪ ᐊᐱᑕ ᑲᑭᓂᑾᓇᑌᒃ ᐃᔥᑯᑌᐎ ᐊᐦᑭᒃ?

ᑭᒋᔭᔭᒃ ᐁᐅᓐᒋᐗᒡ ᐊᑯᑭᒃ ᒥᓇ ᐌᐱᑴᒃ ᑭᒋᓀᑕᑯᓯᐗᒃ᙮ ᐁᔥᑲᒻ ᐯᔑᑯᑎᐱᑲ ᐊᔭᐗᒃ ᐁᑌᐱᓭᑐᐗᒡ ᒋᐗᐸᑕᒧᐗᒡ ᐊᓄᑭᐎᓇᓐ ᒥᓇ ᒋᐗᐸᒪᐗᒡ ᐅᑕᓂᔑᓂᓂᒥᐗᓐ ᐃᐃᒪ ᑲᑕᓇᓄᑭᓂᒡ᙮ ᑭᒋᔭᔭᒃ ᒪᐗᒡ ᑭᒋᓀᑕᑯᓯᐗᒃ ᒥᓇ ᓂᓇᑕᐌᓂᒪᒥᓐ ᑾᔭᒃ ᒋᐎᑕᒪᐗᑲᓀᐗᒡ ᒥᓇ ᑾᔭᒃ ᒋᐗᐸᑕᒧᐗᒡ ᐊᓄᑭᐎᓇᓐ ᑲᑐᑕᒪᒃ ᒋᑭᐌ ᑎᐸᒋᒧᐗᒡ ᑲᐅᓐᒋᐗᒡ᙮

ᐁᔥᑲᒻ, ᐱᓇᒥᓐ ᑲᐅᑭᒪᐎᐗᒡ ᐃᐃᒪ ᑲᐯᔑᐎᓂᒃ ᒥᓇ ᑲᑴᒋᒪᒥᓐ ᐅᑭᒪᑲᓇᒃ ᒋᐎᒋᐗᐗᒡ ᒥᓇ ᑫᓂᓇᐎᓐᑦ᙮ ᐅᐅᐌᑕᔥ ᑲᑐᑕᒪᒃ, ᐅᑭᒪᑲᓐ ᐳᕈᔅ ᒥᓇ ᐅᑭᒪᑲᓐ ᑰᕐᓀᓕᐊᔅ ᐅᐗᐸᒪᐗᓐ ᑲᐱᑭᐅᑌᓂᒡ ᐃᐃᒪ ᐅᑕᐦᑭᒥᐗ ᒥᓇ ᐁᐎᑕᒪᑫᐗᒡ ᑲᐃᔑ ᑲᓇᐗᐸᑕᒧᐗᒡ ᑫᑯᓇᓐ ᑲᒪᒋᑕᓂᐗᒃ ᒥᓇ ᑲᐃᓯᓭᒃ ᐎᒋᐎᑎᐎᓐ ᐃᐃᒪ Noront. ᒥᐦᐅᐌ ᑲᐃᓯᓭᑭᐸᓐ ᐅᑭᒪᑲᓇᒃ ᐁᑭᓇᑭᔥᑲᐗᐗᒡ ᑲᑭᐱᔕᐗᐸᓐ ᓂᓯᓐ ᐅᓐᑌᐃᕐᔪ ᐅᑭᒪᐎᓐ ᐊᓄᑭᓇᑲᓇᒃ ᐅᑕᓇᒃ ᑲᑭ ᐊᐦᑭᐗᒃ᙮

ᑭᓉᔥ ᑲᐃᓯᓭᑭᓐ ᑭᐅᑌᐎᓇᓐ ᐃᑭᐌᓂᐗᒃ ᐊᐦᑭᐎ ᓇᑲᒋᒋᑫᐎᓐ ᑭᑭᓄᒪᐗᑲᓇᒃ ᐱᑲᐯᔑᐗᒃ ᐃᐃᒪ ᐁᔅᑯᕐ ᑲᐯᔑᐎᓂᒃ ᒣᑾᒡ ᐁᑲᑴᑭᔑᑐᐗᒡ ᑲᑭᓂᑾᓇᑌᒃ ᐃᔥᑯᑌᐎ ᐊᐦᑭᒃ ᓇᓇᑐᑭᑫᒋᑫᐎᓇᓐ ᐁᐅᓐᒋ ᓇᑲᒋᐦᐃᑯᐗᒡ ᓛᕃᓐᒐᓐ ᑭᒋᑭᑭᓄᒪᑎᐎᑲᒥᑯᒃ ᑭᑭᓄᒪᑫ Dr. ᒪᔾᒃ ᓓᔓᕐ᙮ ᒥᓇ, ᐁᐊᑌᒃ ᑲᐃᔑᑲᐯᔑᓇᓂᐗᒃ ᐅᐅᐌᑎᓀᑫᑲᒥᒃ, ᒣᑾᒡ ᑲᓂᐱᒃ ᐱᔕᐗᒃ ᐃᑭᐌᓂᐗᒃ ᐅᑭᒪᐎᓐ ᐊᓄᑭᓇᑲᓇᒃ ᐊᐦᑭᐤ ᓇᓇᑲᒋᒋᑫᐎᓐ ᑲᐃᔑᐊᓄᑭᐗᒡ ᒥᓇ ᐅᑭᒪᐎᓐ ᑲᓇᑲᒋᑐᐗᒡ ᐊᐦᑭᐎᓇᓐ᙮

ᒥᓇ ᒪᒋᒡ, ᑲᓂᒪᒋᑕᓂᐗᒃ ᐃᐃᐌ ᓄᐱᒪᑲᒥᒃ ᐊᓄᑭᐎᓇᓐ, ᐊᓂᔑᓇᐯᒃ, ᑭᒋᔭᔭᒃ ᒥᓇ Noront ᓄᑭᓇᑲᓇᒃ ᓇᑐᒪᐗᒃ ᒋᑕᑯᓇᑲᓀᐗᒡ ᑲᐃᔑᒪᑗᐦᐃᑲᓂᐗᒃ᙮ ᐅᓄᐌᓂᐗᓐ ᑲᐱᑕᑯᔑᓄᐗᒡ ᒥᓇ ᑲᒪᒪᒐᐗᒡ ᒥᓉᑕᑯᓄᓐ ᒥᓇ ᐅᓐᒋ ᑭᒋᓀᑕᑯᓐ ᑲᐸᐱᔕᓂᐗᒃ ᐅᐅᒪ ᑲᑭᓇ ᔭᐎᔭ ᒋᒥᓉᑕᒧᐗᒡ᙮