ᐊᓄᑭᐎ ᑭᑯᓄᐦᐅᒪᑫᐎᓐ ᓄᑯᒻ ᐁᑯ ᐗᐸᒃ

ᐱᕋᓐᑕᓐ ᑲᑭᒋᓀᓐᑕᒃ ᐊᓄᑭᐎᓐ ᑲᒧᓂᐦᐃᑫᒡ

ᔭᐦᐊ  ᐱᕋᓐᑕᓐ  ᒐᒻ, ᑲᐯᔑᐎᓐ  ᐎᒋᐦᐃᐌᐎᓐ

ᔭᐦᐃ  ᓂᑕᒻ  ᑲᐎᐅᑕᐱᓇᒪᐸᓐ ᑭᒋ  ᐊᐸᒋᑕᑲᓇᓐ  ᑭᑯᓐᐦᐅᒪᑫᐎᓇᓐ  ᓂᓱ  ᐱᐳᓄᒃ.    ᐸᓂᒪᑕᔥ  ᑲᑭᐸᑭᑎᓂᑯᔭᓐ  ᒋᒪᒋᑐᑕᒪᓐ  ᐗᑎᐸᑯ  ᑭᓯᔅ  2018, ᐎᓐᑫ  ᑭᑭᒋᓀᓐᑕᓐ  ᐁᑯ  ᑭᓭᑫᓐᑕᓐ.

ᔭᐦᐃ  ᑲᓂᓯᐌᑭᓇᑾᒃ  ᑭᒋ  ᐊᐸᒋᑕᑲᓇᓐ  ᑭᑯᓄᐦᐅᒪᑫᐎᓇᓐ  ᑫᐅᓐᒋᑭᑫᓐᑕᒪᓐ  ᐊᓂᓐ ᑫᑐᒋᑲᑌᒃ  ᐱᒥᐱᓇᑲᓀᒡ  ᑲᒪᓀᐦᐃᑫᒡ  ᐅᑕᐸᓐ  ᐁᑯ  ᒪᓇᐦᐃᑫᐎ  ᑭᒋᐅᑕᐸᓐ  (ᒪᐗᒡ  ᑲᑭᒋᓀᓂᒪᒃ).  ᑲᑭᓇ  ᑲᐱᒥᑌᑭᓐ  ᑲᐎᒋᐦᐃᐌᒪᑲᒃ  ᑭᒋᐅᓄᑭᐎᓂᒃ  ᐎᐸᒡ  ᐁᑭᔑᑐᔦᓐᒃ  ᐊᓄᑭᐎᓇᓐ  ᐁᑯ  ᑭᑫᓐᑕᒪᓐ  ᐊᓂᓐ  ᑭᑐᑕᐗᒋᑲᑌᑭᓐ  ᑭᒋ  ᐅᑕᐸᓇᒃ  ᑲᐅᓐᒋᑭᒋᓀᓐᑕᑯᔅ ᐊᓄᑭᐎᓂᒃ  ᐅᐦᐅᒪ  ᓄᕐᐊᓐᑦ.

ᔭᐦᐃᓐᒃ  ᑲᑯᓄᐦᐅᒪᑫᐎᓂᒃ  ᑲᑭᐅᑕᐱᓇᒪᓐ  ᔭᐦᐃᓐᒃ  ᑎᕋᓇᔅ  ᑭᑯᓄᐦᐅᒪᑎᐎᑲᒥᒃ  ᐌᑎ  ᐊᑯᒋᒃ  ᓂᑫᐦᐃ  ᐅᓂᒥᑭᐎ  ᑲᒥᓐᒃ.    ᑲᔭᓄᑡᑌ  ᑭᐃᑯᓭ, ᐊᐱᑕᑲᑭᔑᑲᒃ  ᐱᑎᑲᒥᒃ  ᑭᑕᔑ  ᑲᑯᓄᐦᐅᒪᑯᒥᓐ  ᐊᑾᒥᓯᐎᓇᓐ  ᑭᑭᓄᐦᐅᒪᑯᒥᓐ, ᓇᓇᑲᒋᒋᑫᐎᓐ  ᐁᑯ  ᐊᐱᑕ  ᑭᑯᓄᐦᐅᒪᑫᐎᓇᓐ  ᔭᐦᐃᓐᒃ  ᐊᐸᒋᑕᑲᓇᓐ  ᑭᑭᑯᓄᐦᐅᒪᑯᒥᓐ.    ᑕᑯ  ᐊᓂᓐ  ᑭᑐᒋᑲᑌᑭᓐ  ᑭᒋ  ᐊᐸᒋᑕᑲᓇᓐ  ᑌᑕᑯ ᑭᑭᒋᓀᓐᑕᓐ  ᐁᑯ  ᑎᑕᑯ  ᑭᐊᔑᔥᑭᐤ!

ᑕᑯ  ᐱᓇᒪ  ᑲᑲᑴᒋᒋᑲᑌᑭᓐ ᑭᑯᓄᐦᐅᒪᑫᐎᓇᓐ, ᑭᑯᓄᐦᐅᒪᑫᐎᓂᓂ  ᑲᑭᓇ  ᑲᑭᑯᓄᐦᐅᑲᓀᐗᒡ  ᒋᑭᔑᑐᐗᒡ  ᑲᑭᒥᓇᑲᓀᐗᒡ  ᑭᐅᓄᑲᑕᒧᐗᒡ  ᒋᑭᔑᑐᐗᒡ  ᔭᐦᐁᓂ  ᑭᒋ  ᐊᐸᒋᑕᑲᓂ, ᑎᓄᑲᓐ  ᒋᒧᓇᐦᐊᒧᐗᒡ  ᔭᐦᐃ  ᑭᔑᐱᒪᐯᑫᓭᑭᓐ  ᐱᒥᑌᐎᔭᑉ  ᔭᐦᐃ  ᒪᓇᐦᐃᑫᐎ  ᐅᑕᐸᓐ  ᒋᐊᐸᑕᒃ.    ᑭᑭᑯᓄᐦᐅᒪᑯᒥᓐ  ᒋᐅᑾᒥᓭᔦᒃ  ᒣᑾᒡ  ᑭᒋ  ᐊᐸᒋᑕᑲᓇᓐ  ᐊᐸᒋᑐᔦᒃ ᔭᐦᐁ  ᑲᒪᔥᑾᒃ  ᐊᓇᑾᓐ  ᒋᐱᓯᑲᒣᒃ, ᔭᐦᐁ  ᑕᔥ  ᐱᓯᑾᑲᓐ  ᑲᐗᓴᑯᓯᒃ  ᒋᓇᑾᒃ  ᒣᑾᒡ  ᐅᓄᑭᔦᒃ  ᐁᑯ  ᑲᒪᔥᑾᑭᓐ  ᒪᑭᓯᓇᓐ  ᐁᑯ  ᑕᑯ  ᐅᔥᑭᔑᑯᑲᓇᓐ  ᐁᑯ  ᒥᒋᑲᐗᓇᒃ  ᒥᑾᒡ  ᑲᓭᓂᑲᑌᑭᓐ  ᑭᒋ  ᐊᐸᒋᑕᑲᓇᓐ.    ᔭᐦᐃ  ᑫᔦ  ᑕᑯ  ᑾᔭᒃ  ᒋᑲᓇᐌᓐᒋᑲᑌᑭᓐ  ᑭᒋ  ᐊᐸᒋᑕᑲᓇᓐ ᒋᐳᓯᓂᑲᑌᑭᓐ, ᐊᔑᔥᑭ  ᒋᑭᓯᓂᑲᑌᒃ  ᐅᑕᐸᓂᒃ ᐁᑯ  ᒋᑭᐱᑎᓇᑲᒃ  ᑲᐱᒥᑌᒃ  ᑭᒋ  ᐊᐸᒋᑕᑲᓇᓐ  ᐅᑕᐸᓇᒃ  ᐊᓂᔥᑾ  ᐊᓐᑭᓇᓂᐗᒃ  ᑲᑭᔑᑲᒃ.

ᓂᑕᒻ  ᑲᑭᒪᒋᑕᔭᐸᓐ, ᑭᒋ  ᐅᑕᐸᓐ  ᑲᒧᓂᐦᐃᑫᒡ  ᑲᓴᓐᑫᓐᑕᓇᐸᓐ  ᒋᐱᒥᐱᓇᑲᓀᒡ, ᔕᑯᒡ  ᑭᓂᓇᑲᒋᑐᓐ  ᑲᓂᐱᒥᑭᑭᓄᐦᐅᒪᑯᔭᓐ.    ᐎᓐᑫ  ᓂᒥᓀᓐᑕᓐ  ᐁᑭ  ᐅᓀᓐᑕᒪᓐ  ᒋᐅᑕᐱᓇᒪᓐ ᑭᒋ  ᐊᐸᒋᑕᑲᓇᓐ  ᐅᑕᐸᓐ  ᑭᑯᓄᐦᐅᒪᑫᐎᓐ.    ᐊᔕᔾ  ᐁᑭᑭᔑᑐᔭᓐ  ᑭᑯᓄᐦᐅᒪᑫᐎᓐ  ᒥᐦᐃᐌ  ᒋᓂᐌᓐᒋᓭᒃ  ᒋᑌᐱᓇᒪᓐ  ᐊᓄᑭᐎᓐ  ᓂᑲᓂᒃ  ᐁᑯ  ᑭᑫᓐᑕᓯᐎᓐ  ᐁᑭᑌᐱᓐᒪᓐ.    ᐊᐎᔭᐱᔭᑯ  ᑎᓇ  ᒋᐅᑕᐱᓇᒃ  ᑫᐎᓂᐗ  ᑭᔥᐱᓐ  ᐅᐦᐅᐌᓂ  ᐊᓄᑭᐎᓐ  ᐎᑐᑕᒧᐗᒡ  ᔭᐦᐃᓐᒃ  ᑭᒋ  ᐊᐸᒋᑕᑲᓇᓐ  ᐅᑕᐸᓐ.    ᒥᐦᐅᐌ  ᐅᓄᑭᐎᓐ  ᑫᓇᓐᑕᐌᓐᑕᑾᒃ  ᓂᑲᓂᒃ  ᐊᓂᒪᒋᒋᑲᑌᒃ  ᐊᓯᓂᐎᓐ  ᔭᐦᐃᓐᒃ  ᓄᕐᐊᓐᑦ  ᒥᑭᓯ  ᐅᐗᓯᓴᓂᒃ.    ᐊᓂᐸᑭᓂᑲᑌᒃ  ᐊᓯᓂᑫᐎᑲᒥᑯᒃ, ᒥᐦᐃᐌ  ᐁᔑᐸᑯᓭᓐᑕᒪᓐ  ᑭᒋ  ᐊᐸᒋᑕᑲᓇᓐ  ᐅᑕᐸᓇᓐ  ᒋᐱᒥᐱᓯᔭᓐ  ᐅᑭᒋ  ᐊᓯᓂᐎᓂᒃ.