ᒥᔕ ᒪᒋᒋᑫᐎᓇᓐ, ᐊᑲᓯᓐ ᐱᒥᑲᐗᓐ

ᓂᓐ ᐋᓚᓐ ᑳᐅᑦᔅ, ᑲᓂᑲᓂᔥᑲᒃ ᒥᓇ CEO

ᒥᑭᓯᐤ ᐗᓴᓴᓂᒃ ᐗᑲᐦᐃᑫᐎᓐ ᒋᑌᐱᓯᒋᑲᑌᑭᓐ ᒥᓂᑯᒃ ᑲᐃᓇᑌᒃ ᐃᐃᐌ ᐁᔅᑯᕐ ᑲᐯᔑᐎᓐ

ᐊᐱ Noront ᑲᑭᐎᑕᒪᐗᒡ ᐊᓂᔑᓇᐯᓐ ᐅᐅᒪ ᑲᑲᐯᔑᓂᒡ ᒥᓇ ᑯᑕᑭᔭᒃ ᑫᐎᑕᓄᑭᒪᑲᓀᐗᒡ ᐅᐅᐌ ᐅᓐᒋ ᑲᒪᒋᑕᓂᐗᒃ ᒥᑭᓯᐤ ᐅᐗᓴᓴᓐ ᓄᑕᓯᓂᑫᐎᑲᒥᒃ, ᒥᔑᓐ ᔭᐎᔭᒃ ᐅᑭᐎᑕᓇᐗ ᐅᒥᑯᔥᑲᑌᑕᒧᐎᓂᐗ ᐅᓐᒋ ᐃᐃᐌ ᒥᑕᐦᐃ ᐊᐦᑭ ᑲᑕᔑᐎᑐᓇᓂᐗᒃ ᒋᒪᔑᓭᒃ ᑐᑕᒧᐎᓐ᙮

ᐁᓇᑴᒋᑲᑌᒃ ᐅᐅᐌ ᒥᑯᔥᑲᑌᑕᒧᐎᓇᓐ, Noront ᑲᓇᑲᒋᐗᒡ ᐅᑭᐊᓐᒋᐱᐦᐊᓇᐗ ᐅᐅᐌ ᐊᓄᑭᐎᓐ ᑫᑐᒋᑲᑌᒃ ᒋᑕᐸᓯᓂᑲᑌᒃ ᒥᓂᑯᒃ ᑫᒥᑯᔥᑲᒋᒋᑲᑌᒃ ᐊᐦᑭ ᒪᐗᒡ ᒋᐊᑲᓯᒃ ᐃᐃᒪ ᐊᐦᑭᑲᒃ “ᐱᒥᑲᐌᐎᓐ”᙮

ᐃᐃᐌ ᑲᐎᑐᒋᑲᑌᑭᐸᓐ ᒋᑭᒋᒧᓇᐦᐃᑲᓂᐗᒃ ᐅᑭᑕᑲᒥᒃ ᒥᓇ ᐃᑭᐌᓂᐗᒃ ᑲᑲ ᐊᐸᒋᐦᐊᑲᓀᐗᒡ ᐊᓯᓂᒃ ᒋᒪᐗᑐᐱᐗᒡ, ᑭᔑᐊᔓᑕᒪᒥᓐ ᒋᓄᑕᓯᓂᑲᓂᐗᒃ ᐊᓇᒪᑲᒥᒃ᙮ ᑭᐊᑕᓯᑐᒥᓐ ᒥᓇ ᑫᑐᑕᐗᑲᓀᒡ ᐊᓯᓐ ᑲᐅᑕᐱᓇᑲᓀᒡ ᐊᓇᒪᑲᒥᒃ ᒋᑕᔑᐅᔑᐦᐊᑲᓀᒡ, ᒥᓇ ᑲᒪᒐᑲᒥᒃ ᓂᐱ ᒋᑭᐌᐸᑭᑎᓂᑲᑌᒃ ᐃᐃᒪ ᐊᓇᒪᑲᒥᒃ᙮ ᐅᐅᐌ ᑲᐎᑐᑕᒪᒃ ᑲᐎᓐ ᑫᑯᓐ ᐅᑭᑕᑲᒥᒃ ᑕᑌᓯᓄᓐ ᒪᒐᐳ ᒥᓇ ᐁᑲ ᒋᓄᒋᒋᑲᑌᒃ ᐊᐱ ᑭᐸᑯᓯᒃ ᐅᐅᐌ ᓄᑕᓯᓂᑫᐎᑲᒥᒃ᙮

ᑭᓯᓭ, ᑲᓄᑭᑕᒪᑯᔭᒃ ᑭᑭᒋᐊᓄᑭᐗᒃ ᐁᑭᒪᒥᓄᒋᑫᐗᒡ ᐃᐃᐌ ᒥᑭᓯᐤ ᐗᓴᓴᓂᒃ ᓄᑕᓯᓂᑫᐎᓐ ᒋᑌᐱᓯᒃ ᐃᐃᒪ ᓄᑯᒻ ᑲᐃᔑᐊᑌᒃ ᐁᔅᑯᕐ ᑲᐯᔑᐎᓐ ᐁᑕᔑᓄᒋᒋᑲᓂᐗᒃ ᑲᐃᔑᐱᒥᑲᐌᓇᓂᐗᒃ ᑲᐃᒋᑲᑌᒃ 36 ᑕᓱ ᑲᑲᑭᑎᐸᐦᐊᐸᓐ (ᐗᐸᑕᓐ ᑲᐃᔑᒪᓯᓇᑭᑌᒃ ᐊᐦᑭᐎᒪᓯᓇᐦᐃᑲᓂᒃ)᙮ ᐃᐃᐌ ᑲᐃᓇᑭᑕᓱᓀᐱᐦᐃᑲᑌᒃ, ᐊᑯᑭᒃ ᐃᔥᑯᓂᑲᓐ ᑲᐃᔑᐊᑌᒃ 48 ᑲᑲᑭᑎᐸᐦᐊᐸᓐ ᐃᓂᑯᑾ ᒥᓇ ᐌᐱᑴ ᑲᐃᔑᐊᑌᒃ ᑕᐎᓐ 50 ᑲᑲᑭᑎᐸᐦᐊᐸᓐ ᐃᓂᑯᑾ᙮

ᒪᐗᒡ ᐁᒥᓋᔑᒃ ᒥᓇ ᐊᐦᑭᐎ ᓇᓇᑲᒋᒋᑫᐎᓇᓐ ᐁᓄᑲᑭᓐ ᐃᐃᒪ ᑲᐃᔑᐊᑌᒃ ᒉᒻᔅ ᐯ ᑲᐃᔑᑕᐸᓴᑲᒥᑲᒃ, ᑲᐃᔑᐊᑌᒃ ᑲᑭᓂᑾᓇᑌᒃ ᐃᔥᑯᑌᐎ ᐊᐦᑭ, ᑭᒋᓀᑕᑯᓐ ᐁᑲ ᐊᐗᔑᒣ ᒋᐱᑯᓂᑲᑌᒃ ᑲᑕᔑᔓᓂᔭᑫᒪᑲᑭᓐ ᒪᒋᑕᐎᓇᓐ᙮ ᒥᐦᐅᐌ ᑲᐃᔑᒋᑫᒡ Noront ᐁᑭᒋᓀᑕᒃ ᐊᐦᑭᐎᓇᓐ ᒥᓇ ᑲᐎᑕᓄᑭᒪᔭᒃ ᐁᓇᓇᑕᐗᐸᑕᒪᒃ ᑫᐃᔑᒥᓄᓭᑭᓐ, ᐎᑕᓄᑭᒥᑎᐎᓇᓐ ᒣᑾᒡ ᑲᓄᒋᒋᑲᑌᑭᓐ ᐊᐦᑭᐎᓇᓐ ᐅᐅᐌᑎᓀᑫ ᓂᑲᓂᒃ᙮