Employee Profile: ᐃᓚᔭᔅ ᐗᐱᑎᑾᓐ

ᐃᔑᓂᑲᓯᐎᓐ:
ᐃᓚᔭᔅ ᐗᐱᑎᑾᓐ

ᑕᔑᑫᐎᓐ:
ᐌᐱᑴ ᑕᔑᑫᐎᓐ

ᑲᐃᓇᓄᑭᒡ:
ᑲᐯᔑᐎᓐ ᐎᒋᐦᐃᐌᐎᓐ

 

ᐊᓂᓐ  ᐁᔑᓇᑾᒃ  ᑲᓂᐱᒋᑭᔑᑲᒃ?

ᒥᐦᐅᐌ  ᑎᓄᑲᓐ, ᒋᑄ  ᐱᑕᐸᒃ  ᓂᑯᔥᑯᔅ  ᐃᑯᑕᔥ  ᑕᓐᑐ  ᑲᐱ  ᒥᓂᑴ  ᐁᑯ  ᓂᑭᔑᐌᐸᐎᓯᓐ.  ᑕᓐᑐ  ᓇᑭᔥᑾᒃ  ᐃᑕᔥ  ᑲᐎᑕᓄᑭᒪᑾ  ᔭᐦᐃᒃ  ᑲᑕᓄᓇᑭᓇᓂᐗᒃ  ᑲᑕᔑᒪᒪᐤᐎᔥᑲᔦᒃ  ᐁᐎᓐᑕᒶᑫᐎᓇᓐ  ᐁᑯ  ᐊᓐᑾᒥᓯᐎᓐ  ᓂᐎᓐᑕᒪᑯᒥᓐ  ᒋᑄ  ᒧᔥᑭᓂᐱᐦᐊᒣᒃ  FLRA (ᐊᓄᑭᐎ  ᐊᓂᓐ  ᑫᐱᒋᓭᒃ  ᓇᓇᓐᑐᑭᑫᓐᒋᑫᐎᓐ) ᒪᓯᓂᐦᐃᑲᓀᔅ.    ᒥᑕᔥ  ᐁᓂᔑᒪᒋᐊᓄᑭᔦᒃ.  ᔭᐦᐃ  ᑲᐯᔑᐎᓐ  ᐎᒋᐦᐃᐌᐎᓐ, ᒥᔑᓂᐌᑭᓇᑯᓐ  ᑲᓂᓇᓄᑭᔭᓐ  ᑫᓂᑭᔑᑲᒃ  ᔕᑯᒡ  ᐸᓂᒪ  ᑲᑭᑫᓐᑕᓐ  ᐊᓂᓐ  ᐁᑯᓂᓐ  ᐁᓇᓐᑕᐌᓐᑕᑾᒃ  ᑲᔑᐌᒋᐦᐃᐌᔭᓐ.  ᓂᑕᓄᑭᐎᓐ  ᑕᑯᓭ  ᒋᓇᓇᑲᒋᑐᔭᓐ  ᐗᓴᑯᓀᓐᒋᑲᓐ  ᒪᑎᓂᑲᒋᑲᓐ, ᑲᑎᑎᐱᑌᒃ ᐱᒥᓭᐎᓐ, ᐅᑕᐸᓀᔅᓴᒃ, ᑲᓂᐎᓯᑌᐗᒡ, ᐊᕐᑯᒃ, ᐁᑯ  ᑭᒋ  ᐊᐸᒋᑕᑲᓇᓐ, ᑭᓯᓇᒪᓐ  ᐗᑲᐦᐃᑲᓇᓐ, ᑯᓐ  ᒋᑕᐌᐸᐦᐸᑾ  ᑲᔑᐱᒧᓭᓇᓂᐗᒃ, ᒋᒐᑭᓴᒪᓐ  ᐌᐱᓂᑲᓇᓐ  ᑲᔑᒐᑭᓯᑲᑌᑭᓐ  ᑫᑯᓇᓐ etc.

ᑲᐱᐳᓐᒃ, ᒥᑯᒻ  ᓂᓇᓇᑲᒋᐦᐊᒥᓐ  ᐁᑯ  ᐸᓂᒪ  ᓂᔓᒥᓯᑦ  ᐊᐱᑎᓯᒡ, ᐳᓂᐎ  ᒥᑲᓇ  ᑐᔑᑐᒥᓐ  ᒥᑯᒥᒃ  ᑯᐳ  ᓴᑲᐦᐃᑲᓂᒃ  ᐁᑯ  ᓂᑕᐌᐸᐦᐊ  ᑯᓐ  ᐸᓂᐎ  ᒥᑯᒥᓐᒃ  ᒋᒥᓇᐗᔑᒃ  ᒋᐳᓂᒪᑲᑭᓐ  ᐱᒥᓭᐎᓇᓐ.    ᐁᑯ  ᑲᑕᑯᐎᑌᑭᓐ  ᐗᓯᑲᒥᑌ, ᓂᒪᒪᐤᐎᐊᓄᑭᒥᓐ  ᐁᐊᑾᒥᓯᔦᒃ  ᑲᓂᐎᑯᐳᐎᒋᑲᑌᑭᓐ  ᐗᓯᑲᒥᑌ  ᐁᑯ  ᓂᐱᑎᑫᑐᒥᓐ  ᐗᓯᑲᒥᑌ  ᑲᔑᑲᓂᐌᓐᑐᑯᑭᓐ  ᐗᑲᐦᐃᑲᓂᒃ.

ᒥᓇᐦᐅᐌ  ᓂᑕᒻ  ᐊᓄᑭᐎᓐ  ᐁᑭᑌᐱᓇᒪᓐ  ᐅᐦᐅᒪ  ᓄᕐᐊᓐᑦ  ᐁᑯᓂᓐᑕᔥ  ᐁᑭᐅᓐᒋᐱᑫᐌᔥᑲᔭᓐ?  

ᐎᓐᑫ  ᓂᑭᒋᓀᓐᑕᓐ  ᐅᐦᐅᒪ  ᐁᐃᔑᐊᓄᑭᔭᓐ  ᑲᔑᒥᓀᓐᑕᑾᒃ  ᑕᑯ  ᐁᒥᓀᓐᑕᑯᓯᐗᒡ  ᐃᓂᓂᐗᒃ  ᐁᑯ  ᓂᒥᓀᓐᑕᓐ  ᐸᑲᓂ  ᑫᑯᓇᓐ  ᐁᓂᑭᑫᓐᑕᒪᓐ.    ᐅᐦᐅᒪ  ᓄᕐᐊᓐᑦ, ᑕᓱᑭᔑᑲ  ᐸᑲᓂᑫᑯᓐ  ᑕᓂᑭᑫᓐᑕᓇᓐ.    ᒥᑕᔥ  ᐅᐦᐅ  ᑌᐺ, ᑲᔑᐱᒪᑎᓇᒃ  ᑲᐯᔑᐎᓂᒃ  ᒪᐗᒡ  ᓂᑭᒋᓀᓐᑕᓐ  ᐅᐦᐅᒪ  ᐁᐃᔑᐊᓄᑭᔭᓐ  ᐁᒥᓀᓐᑕᑯᓭᐗᒡ  ᑲᐎᑕᓄᑭᒪᑾ ᐃᓂᓂᐗᒃ, ᑕᑯᑕᔥ  ᐁᐯᓂᐱᑾᒡ  – – ᑲᐎᓂᓐ  ᑕᑭᐗᓂᑯᑕᓯᓐ  ᐃᐦᐃᐌ  ᒋᑕᔑᑕᒪᓐ!

ᐁᑯᓂᓐ  ᑯᑕᑭᔭᓐ  ᐁᐎᐎᓐᑕᒪᓐ  ᑲᑭᐱᓇᓄᑭᔭᓐ  ᑲᑯᐱᒪᑎᓯᔭᓐ?

ᐁᐦᐁ, ᒥᐦᐅᐌ  ᑕᐎᓐᑕᓐ  ᑭᔥᐱᓐ ᐁᓯᓭᒃ  ᑭᑯᓄᐦᐅᒪᑫᐎᓐ  ᐸᑭᑎᓂᑲᑌᒃ  ᒪᓂᐱᑐᑲᓐ  ᔭᐦᐃᒃ  ᓂᔑᓇᐯ ᑭᑯᓄᐦᐅᒪᑫᐎᓐ  ᐁᑯ  ᐊᓄᑭᐎ  ᑭᑯᓄᐦᐅᒪᑫᐎᓐ  (NEAT).    ᑭᒋᓀᓂᒥᑎᓱᓐ  ᐁᑯ  ᓇᓇᓐᑐᑭᑫᓐᑕᓐ  ᐊᓂᓐ  ᑭᔑᒪᒋᔥᑲᔭᓐ  ᑲᐎᔑᐊᓄᑭᔭᓐ.    ᓂᑭᑭᔑᑐᓐ  ᓂᔑᓐ  RoFATA ᐊᓄᑭᐎ  ᑭᑯᓄᐦᐅᒪᑫᐎᓇᓐ  ᔭᐦᐃᒃ  KKETS.  ᐁᑯᑕᔥ  ᑕᑯ  ᒥᑎᑯᑭᐎᓂ  ᑭᑯᓄᐦᐅᒪᑫᐎᓐ  ᑭᑭᔑᑐᓐ  ᔭᐦᐃᒃ  ᐎᓂᐯᒃ  2012 ᐊᐱ  ᐁᑯ  ᓄᑯᒻ  ᑲᑭᓂᐱᒃ  ᔭᐦᐃ  ᑭᐅᑕᐱᓇᓐ  ᒋᑭ  ᐅᐸᒋᑕᑲᓇᓐ  ᐊᓄᑭᓇᑲᓐ  ᑭᑯᓄᐦᐅᒪᑫᐎᓐ  ᑕᓱᑭᓯᔅ  ᔭᐦᐃᒃ  ᐊᓂᒥᑭᐎ  ᑲᒥᓐᒃ  ᐅᓐᑌᕆᔭ.

ᐊᓂᓐ  ᐁᐃᓀᓐᑕᒪᓐ  ᑫᓂᔑᓇᑾᒃ  ᓂᑲᓂᒃ  ᓄᕐᐊᓐᑦ  ᐊᓂᒪᒋᓭᒃ  ᐊᓯᓂᑫᐎ  ᐊᓄᑭᐎᓐ.

ᒥᐦᐅᐌ  ᐁᔑᐸᑯᓭᓐᑕᒪᓐ  ᑭᔭᐸᒡ  ᒋᐊᓄᑭᔭᓐ  ᒋᑭᐱᐗᐱᑯᑲᓂᓐᒃ  ᐁᑯ  ᒋᐎᒋᐦᐊᑾ  ᓄᕐᐊᓐᑦ  ᐅᐦᐅᒪ  ᑲᐯᔑᐎᓂᒃ  ᑭᔭᐸᒡ  ᒋᐸᑭᓯᒃ  ᐁᑯ  ᒋᒥᓄᓭᒃ.    ᒥᐦᐅᒪ  ᐁᐎᑕᔑᐊᓄᑭᔭᓐ  ᒋᐊᓂᑭᑫᓐᑕᒪᓐ  ᑲᐯᔑᐎᓐ   ᐎᒋᐦᐃᐌᐎᓂᒃ  ᐁᑯ  ᓂᑭ  ᒋᓂᐅᑭᒪᑲᑕᒪᓐ  ᐅᐦᐅᒪ  ᑲᐯᔑᐎᓂᒃ.

ᐁᑯᓀᓐ  ᑯᑕᒃ  ᐁᐎᑭᑐᔭᓐ  ᐊᐗᔑᒣ?

ᒥᐦᐅᐌ  ᐁᐃᑭᑐᔭᓐ, ᒋᒥᓀᓐᑕᒪᓐ  ᐱᑯ  ᑲᐊᓇᓄᑭᔭᓐ.    ᑲᓂᑫᓐᑕᔥ  ᒋᐱᑐᔭᓐ  ᑭᓇᓐᑕᐌᓐᑕᒪᓐ  ᐊᐸᒋᑕᑲᓇᓐ  ᑫᑯᓇᓐ  ᒋᐊᐱᒋ  ᑐᑕᒪᓐ  ᐁᑲ  ᐊᓄᑭᔭᓐ.    ᔭᐦᐃᓐ ᓂᓐ  ᐱᐗᐱᑯᓐᓴᓐ  ᓂᐱᑐᓇᓐ  ᐁᑯ  ᓂᓇᓐᑐᑕᓇᓐ  ᑲᓇᑲᒧᐗᑐᑯᑭᓐ.    ᐁᑯᑕᔥ  ᓂᓂᑕᑲᑴᒋ, ᓂᑭᒋᓂᓐᑕᓐ  ᑲᑴᒋᐎᑲᒥᒃ  ᐁᑭᐅᔑᒋᑲᑌᒃ  ᑲᐯᔑᐎᓂᒃ.    ᒥᑴᒡ  (Thanks) ᑲᑭᓇ  ᑭᑎᓂᓄᒻ  ᑲᑭᐊᑭᑕᒣᒃ  ᓂᐎᑕᒪᑭᐎᓇᓐ .    ᑭᑭᒥᓂᓐᑕᓇᐗ   ᒪᐎᓐ  ᑲᑭᐸᑭᑎᓇᒪᓐ  ᑫᓂᓐ  ᐸᑭ!

ᐅᐦᐅᒪ ᐃᔑᓇᑴᑕᓐ