ᐃᔕᔭᓐ ᑲᔑᐱᒪᑎᓇᒃ

ᔭᐦᐊ  ᑲᕐᑎᔅ  ᑯᔅᑐᕐ, ᐊᑯᒋᓐᒃ ᐊᓄᑭᓇᑲᓐ

ᒥᑌᐦᐁ  ᓇᓐᑕᐌᓐᑕᑯᓐ  ᐱᒥᔭᐎᓐ ᐊᓄᑭᐎᓇᒃ  ᑲᔑᐊᓄᑭᓇᓂᐗᒃ  ᑲᔑᑲᐯᔑᓇᓂᐗᒃ.    ᑲᔑᐱᒪᑎᓐᒃ  ᑲᐯᔑᐎᓐ  ᑲᔑᒪᔥᑭᑯᐗᒃ  ᐃᔑᐊᑌ  ᐌᑎ  ᒉᔾᒻᔅ  ᐯᔾ  ᑲᔑᑕᐸᓯᑕᓇᒃ, ᐊᓂ  ᐊᐱᒋ  ᐊᓐᒋᓭ  ᐱᒥᔭᐎᓐ ᑲᑕᓱ  ᐊᓐᑕᑭᐗᒃ.

ᐱᓀᒋᒡ-ᑲᐃᓇᐱᔑᒃ ᐌᑎ ᑭᒋᐱᐗᐱᑯᑲᓂᓐᒃ ᒣᑾᒡ ᑲᐱᒥᓭᓇᐗᒃ ᐌᑎ ᑲᔑᐱᒪᑎᓇᒃ ᑲᐯᔑᐎᓂᒃ ᐁᐃᔕᓂᐗᒃ.

ᓂᑕᒻ  ᑲᔑᒪᒋᑕᔦᒃ  ᐱᓇᒪ  ᐱᒥᔭᐎᓂᒃ  ᐁᓇᓇᑲᒋᒋᑲᑌᒃ  ᔭᐦᐊ  ᐱᒥᔭᐎᓂ  ᐅᑭᒪ, ᑲᑎᕋᓐ  ᓂᔾᒥ.    ᔕᑯᒡ  ᐅᓐᒋᑭᑫᓐᑕᑯᓐ  ᐊᓐᑎ  ᐁᐅᓐᑕᓭᔭᓐ, ᑲᐎᐱᒥᔭᓇᓂᐗᒃ  ᐁᔥᑲᒻ  ᐎᐸᒡ  ᒪᒋᑕᓂᐗᓐ  ᐁᑯ  ᑎᓄᑲᓐ  ᑯᑡᓯ  ᑎᐸᐦᐃᑲᓀᔅ  ᑭᔑᐌᑄᔑᒃ, ᒥᑕᔥ  ᐁᓂᒪᒋᐱᒥᔭᔦᒃ  ᐁᓂᔕᔦᒃ  ᐌᑎ  ᑲᔑᐱᒪᑎᓇᒃ.    ᐌᑎ  ᑕᔥ ᑎᐱᓂᑯᒥᓐ  ᓇᑭᓇ   ᐳᓂᐎᓂᒃ  ᒣᑾᒡ  ᑲᐱᐳᒃ  ᐁᑯ  ᓇᓯᐱᑲᓇᒃ  ᑎᐱᓂᑯᒥᓐ  ᑲᓂᐱᒃ  ᐌᑎ  ᓇᑭᓇ.    ᓇᑭᓇ  ᐌᑎ  ᑭᐌᑎᓄᒃ  ᓂᔅᐗᒃ  ᐊᐱᒋᓇᑯᓐ  ᐊᐱᒡ  ᐊᓂᒥᑭᐎ  ᑲᒪᓐᒃ, ᐁᑯᑕᔥ  ᐃᐦᐃᒪ, ᐁᓂᐊᓐᒋᐳᓯᔦᒃ  ᐱᒥᓭᐎᓐ  ᔭᐦᐃᒃ  ᑯᐳ  ᓴᑲᐦᐃᑲᓂᒃ  ᐁᓇᑯᒋᓂᔦᒃ.    ᒥᐦᐃᒪ  ᐊᑴᓇᒃ  ᐁᑭᓂᑲᓇᐱᔭᓐ  ᑲᐊᑲᒋᒃ  ᐱᒥᓭᐎᓂᒃ  ᒣᑾᒡ  ᑲᔑᐱᒪᑎᓇᒃ  ᑲᐱᒥᔭᔦᒃ, ᐁᑲ  ᑲᐎᓂᓐ  ᓇᐱᒡ   ᐊᐎᔭᒃ  ᒪᔑ  ᑲᑐᑕᒧᐗᒡ.

ᐁᑯ  ᑲᐱᐳᒃ, ᐱᒥᓭᐎᓇᓐ  ᒥᑯᒥᒃ  ᐁᔑᐳᓂᒪᑲᑭᓐ  ᔭᐦᐃ  ᑯᐳ  ᓴᑲᐦᐃᑲᓂᒃ  ᐳᓂᐎᓂᒃ.    ᐁᑯᑕᔥ  ᐃᐦᐃᒪ, ᔭᐦᐊ  ᐃᔅᑭᑐ  ᑎᐱᒥᐱᓯᒥᓐ  ᑲᐯᔑᐎᓂᒃ.    ᒥᑕᔥ  ᐅᐦᐅᐌ, ᑲᐅᓐᒋ  ᑭᔓᐦᐅᔦᒃ  ᐱᐳᓄᑯᓇᓐ  ᐁᐱᓯᑲᒣᒃ  ᒋᑄᐳᓯᔦᒃ  ᑫᔦ  ᐱᒥᓭᐎᓂᒃ  ᓇᑭᓇ.    ᐁᑯ  ᑲᓂᐱᒃ, ᑲᑕᑯᔑᓂᔦᒃ  ᑯᐳ  ᓴᑲᐦᐃᑲᓂᒃ  ᓂᐱ  ᐱᒥᓭᐎᓐ  ᐁᑯ  ᑲᑎᑎᐱᑌᒃ  ᐱᒥᓭᐎᓐ  ᐌᑎ  ᐊᐗᔑᒥ  ᑎᔑᐎᓂᑯᒥᓐ.

ᒪᐗᒡ  ᑲᑭᒋᓀᓐᑕᒪᓐ  ᑲᐱᒥᔭᔭᓐ  ᑲᐊᓐᑕᑭᐗᒃ  ᔭᐦᐃ  ᑲᑕᑾᑯᒃ.    ᑲᓯᑾᒃ  ᐁᑯ  ᑲᑕᑾᑯᒃ  ᒥᐦᐃᐌ  ᐁᔑᑭᑫᓐᒋᑲᑌᒃ  “ᑲᔑᐸᑾᐦᐊᒃ  ᒥᑯᒻ”  ᐁᑯ  “ᑲᔑᑲᔥᑲᑎᒃ”  ᑲᐊᓐᑕᑭᐗᒃ  ᐁᑯ  ᑲᐃᓇᑯᒋᓂᔦᒃ  ᐌᐱᑴ  ᑕᔑᑫᐎᓂᒃ  ᐳᓂᐎᓂᒃ  ᓂᔑᐗᓯ  ᒥᑕᓇ  ᐁᑎ  ᑭᐌᑲᐸᐎᓂᒃ  ᐊᐱᒋᓇᑯᓐ  ᑲᔑᐱᒪᑎᓇᒃ, ᑲᑎᑎᐱᑌᒃ  ᐃᑕᔥ  ᑐᑕᐱᓇᒥᓐ   ᐌᑎ  ᐁᓂᓱᓂᑯᔦᒃ  ᑲᔑᐊᓄᑭᔦᒃ.  ᐁᑯ  ᒥᐦᐃᐌ  ᐸᑭ  ᐁᐎᑕᒪᓐ…ᒥᐦᐃᐌ  ᑲᑐᑕᒪᓐ ᑲᐱᒥᔭᔭᓐ  ᓂᐊᓄᐎᓂᒃ!

ᐃᓇᐱᑲᓐ  ᑲᒪᓯᓇᑎᓭᒃ  ᑲᐱᒥᔭᔭᒃ  ᑲᔑᐱᒪᑎᓇᒃ  ᐁᑯ  ᐱᐗᐱᑯᒃ  ᒥᑭᓯ  ᐅᒐᑉ  ᐅᔑᐱᐦᐃᑲᓇᓐ.