ᐁᑯᓀᓐ ᑕᔥ ᓱ?

ᓂᓐ ᔅᑎᐱᓐ ᐳᓗᐎᓕᓐᒃ, CDO

ᒣᑾᒡ ᒣ 7, 2019, Noront ᐅᑭᐎᑕᓐ ᓱ ᓭᓐᑦ ᒫᕆ ᒋᔑᐊᑌᒃ ᑫᓂᐅᔑᒋᑲᑌᒃ ᐊᓯᓂᒃ ᑫᑕᔑ ᐅᔑᐦᐊᐗᑲᓀᐗᒡ ᐗᑲᐦᐃᑲᓐ (FPF)᙮

ᓱ ᓭᓐᑦ ᒪᕆ ᑲᐅᑭᒪᐎᒡ ᑯᕆᔅᒋᓐ ᐳᕃᐱᓴᓄ ᐁᑲᑭᑐᒡ ᑲᐎᒋᑲᑌᒃ ᐃᐃᐌ FPF ᐎᑕᒪᑫᐎᓐ

ᐅᐅᐌ ᑲᑭᑐᒋᑲᑌᒃ ᓂᔓᐊᐦᑭ ᐁᑭᑕᔑᑲᒪᒃ ᐁᑭᓇᑲᒋᑐᔭᓐᒃ ᓂᐎᓐ ᑲᑴᑌᐎᓇᓐ ᐱᓂᔥ ᐁᑭᐯᔑᑯᒃ ᑲᑭᐅᓀᑕᒪᓐᒃ᙮ ᐁᑯᓀᑕᔥ, ᒪᔭᒻ ᑲᑭᐅᓐᒋ ᐅᓀᑕᒪᒃ ᐃᐃᐌ ᓱ?

ᓂᑕᒻ, ᐃᔑᑭᑫᑕᑯᓐ ᐃᓂᐌᓂᐗᓐ ᑲᑕᔑᐅᔑᐦᐊᑲᓀᒡ ᐊᐊᐌ ᐊᓯᓐ ᑭᓉᔥ ᐃᓯᓭ ᒥᓇ ᐁᐊᑭᑌᒃ ᒋᐅᔑᒋᑲᑌᑭᓐ᙮ ᒥᑕᔥ ᐅᐅᐌ, ᐃᐃᐌ ᑫᑕᔑᐅᔑᐦᐊᑲᓀᒡ ᐊᐊᐌ ᐊᓯᓐ ᒋᑭᐅᔑᒋᑲᑌᒃ ᐁᑭᑫᑕᑯᓯᒡ ᐊᐊᐌ ᐊᓯᓐ ᐁᐊᑭᓱᒡ ᒥᓇ ᐁᒥᓄᔑᔑᒡ ᒥᔑᓄᐊᐦᑭ ᒋᑐᒋᑲᑌᒃ᙮ Noront ᐅᑕᔭᓇᐗ ᓂᓯᓐ ᑲᒪᔥᑲᐎᓯᒡ ᐊᓯᓐ ᑲᐃᔑᐊᐱᒡ ᐁᑭᑫᓂᒪᑲᓀᒡ ᐊᐊᐌ ᐊᓯᓐ ᒋᑭᐅᑕᐱᓇᑲᓀᒡ ᒥᓇ ᒋᐅᔑᐦᐊᑲᓀᒡ ᐊᐊᐌ ᐊᓯᓐ ᑲᒪᔥᑲᐎᓯᒡ ᐱᐗᐱᒃ ᐅᐅᒪ ᒥᓯᑌᑲᒥᒃ ᒋᔑ ᐊᑕᐗᓱᒡ ᒥᓂᑯᒃ 100 ᑕᓱ ᐊᐦᑭ᙮

ᐁᐅᓀᒋᑲᑌᒃ ᑫᐃᔑᐅᔑᒋᑲᑌᒃ, ᐃᐃᒪ ᒋᑭᔑᐊᑌᑭᐸᓐ ᑲᑭᔑᒥᑲᐗᑲᓀᒡ ᐊᐊᐌ ᐊᓯᓐ (ᐁᑲ ᒥᑕᐦᐃ ᒋᓇᑭᑌᒃ ᑲᐱᒥᐎᓇᑲᓀᒡ) ᑲᔦᒪ ᐃᐃᒪ ᓂᐱᑲᒃ (ᓇᐗᒡ ᒋᐌᒋᓭᒃ ᐃᐃᐌ ᒣᑎᓂᑫᐎᓐ ᑲᐱᒥᐎᓇᑲᓀᒡ ᒋᐊᑕᐗᓱᒡ)᙮ ᐃᐃᐌ ᑲᑭᓂᑾᓇᑌᒃ ᐃᔥᑯᑌ ᐊᐦᑭᒃ ᓂᐱᐗᓐ, ᒪᔥᑭᑯᐗᓐ ᐊᐦᑭ ᐁᑲ ᑫᑯᓐ ᒥᓇ ᒋᑭ ᐃᔥᑯᑌᐎᒋᑲᑌᒃ, ᑭᑭᑫᒋᑲᑌᒃ ᑕᔥ ᐁᑲ ᒋᑭᐅᔑᒋᑲᑌᒃ ᐃᐃᒪ ᐯᔓᓐᒡ ᑲᑭᔑᒥᑲᐗᑲᓀᒡ ᐊᐊᐌ ᐊᓯᓐ᙮ ᒥᑕᔥ ᑲᑭᑐᒋᑲᑌᒃ, ᐁᑭᓇᓇᑕᐗᐸᑕᒪᒃ ᑫᐃᔑᐊᑌᒃ ᐃᐃᐌ ᑫᑕᔑᐅᔑᐦᐊᑲᓀᒡ ᐊᐊᐌ ᐊᓯᓐ ᒥᓇ ᐁᑭᓂᐗᑭᓐ ᐃᓂᐌᓂᐗᓐ ᐅᑌᓇᓐ ᑲᑭᑲᑴᑌᐗᒡ᙮

ᑲᑭᓇ ᐃᓂᐌᓂᐗᓐ ᐅᑌᓇᓐ ᐅᑭᐊᔭᓇᐗ ᐃᓂᐌᓂᐗᓐ ᐊᐦᑭᓐ ᑫᑭᑕᔑᐊᓴᑲᓀᒡ ᐊᓯᓂᓐ, ᔕᑯᒡ ᑭᒧᒋᐯᔑᑯᓐ ᐁᑭᐊᔭᐗᒡ ᐅᓄᐌᓂᐗᓐ ᑲᑭᓇ ᐗᑲᐦᐃᑲᓇᓐ, ᐃᔥᑯᑌᐎᔭᐱᒋᑫᐎᓐ, ᑲᓇᑲᒋᐗᒡ ᐊᓄᑭᓇᑲᓇᒃ, ᐅᑌᓇᒃ ᐁᐎᒋᑐᒡ ᒥᓇ ᐁᐯᔑᓇᑯᒃ ᐃᐃᒪ ᒋᐅᓐᒋ ᒪᒋᐎᓱᒡ ᐊᓯᓐ ᐃᐃᒪ ᑭᒋᑲᒥᒃ᙮ ᓱ ᓭᓐᑦ ᒪᕆ ᑭᑕᐸᓯᓭ ᒣᑎᓂᑫᐎᓐ ᐁᑭᑎᐸᑭᒋᑲᑌᒃ ᑫᐃᓇᑭᑌᒃ ᒥᓂᑯᒃ ᑫᐊᓄᑭᒪᑲᒃ ᐅᐅᐌ ᓄᑕᓯᓂᑫᐎᓐ ᐁᑭᒥᓄᓭᒃ ᒪᔭᒻ ᑲᐃᔑᓇᑕᐌᑕᒪᒃ᙮

 

ᐊᑐᐣ ᑭᑎᑭᑐᐎᐣ