ᐃᐃᒪ ᐃᐣᑎᔭ ᐊᑯᓇᐠ ᐁᐢᑯᕒ

ᐃᔑᓂᑲᓱᐎᐣ:
ᑫᕒᐊᐣ ᐸᑌᓬ

ᐃᐡᑯᓂᑲᐣ:
ᑕᐣᑐᕒ ᐯ

ᑭᑕᓄᑭᐎᐣ:
ᒥᓄᔭᐎᐣ ᒥᓇ ᐊᐣᑾᒥᓯᐎᐣ ᐊᓄᑭᓇᑲᐣ

 

ᐊᓂᐣ ᐁᐣᑐᑕᒪᐣ ᐅᐅᒪ Noront?

ᒣᑾᐨ ᐁᐃᓇᓄᑭᔭᐣ ᒥᓄᔭᐎᐣ ᒥᓇ ᐊᐣᑾᒥᓯᐎᐣ ᐊᓄᑭᐎᐣ, ᐃᐃᐌ ᐊᓄᑭᐎᐣ ᐁᑭᐅᑕᐱᓇᒪᐣ ᒣᑾᐨ ᑲᑭᐱᒥᑭᑭᓄᒪᑯᔭᐣ ᐃᐃᒪᓀᑫ ᑭᑭᓄᒪᑎᐎᑲᒥᑯᐠ ᐱᐗᐱᑯ ᓇᑲᒋᐎᐣ ᒪᒋᑕᐎᐣ ᒥᓇ ᐊᐣᑾᒥᓯᐎᐣ ᐱᒥᐎᒋᑫᐎᐣ ᐃᐃᒪ ᑳᐣᐯᑐᕒᐁᔑᐣ ᑭᑭᓄᒪᑎᐎᑲᒥᐠ᙮

ᐊᓂᐣ ᐁᔑᓇᑯᐠ ᐯᔑᑾ ᑲᑭᔑᑲᐠ ᑭᐣ ᐅᐣᒋ?

ᐁᒪᒋᑕᔭᐣ ᓂᓇᑲᒋᑐᓇᐣ ᒥᓇ ᓂᓇᑴᑕᓇᐣ ᐱᐗᐱᑯᐠ ᒪᓯᓇᐦᐃᑲᓇᐣ, ᒥᓇ ᑕᓂᐅᓇᑐᐣ ᑭᔑᑲᒼ ᐃᐃᐌ ᑲᑭᔑᑲᐠ᙮ ᒥᐌ ᐁᐣᑐᑕᒪᐣ ᐁᐅᓇᑐᔭᐣ ᐊᓄᑭᐎᐣ ᒪᓯᓭᐎᐣ ᓇᑲᒋᒋᑫᐎᓇᐣ ᐃᓂᐌᓂᐗᐣ ᑫᓇᑲᒋᒋᑲᑌᑭᐣ, ᐁᐎᒋᑐᔭᐣ ᒥᓇ ᐊᐦᑭᐎᓂᐠ ᒥᓇ ᐊᓄᑭᐎᓂᐠ ᐅᑭᒪ ᒪᐃ˙ᐠ ᑌᓯᓬᐁᐟᐢ, ᒥᓇ ᐁᐅᓇᒋᑫᔭᐣ ᒥᓄᔭᐎᐣ ᐱᒥᐎᒋᑫᐎᓇᐣ ᒥᓇ ᑐᑕᒧᐎᓇᐣ᙮ ᒥᓇ ᐱᒥᓇᑲᒋᑐᓇᐣ ᐊᓄᑭᓇᑲᐣ ᐅᑭᑭᓄᒪᑯᐎᓇᐣ ᒥᓇ ᑫᐃᔑᑲᓇᐗᐸᒋᑲᑌᑭᐣ ᑭᑭᓄᒪᑫᐎᓇᐣ᙮

ᐊᓂᐣ ᑲᐃᓀᑕᒪᐣ ᑲᑭᑭᐅᑌᔭᐣ ᐃᐃᒪ ᐁᐢᑯᕒ ᑲᐯᔑᐎᓂᐠ?

ᒥᐌᑎ ᐌᐣᒋᔭᐣ ᐃᐣᑎᔭ ᐊᐦᑭᐠ ᑭᐡᐱᐣ ᑲᑕᑲᔭᐠ ᑭᔑᑲ 10 ᐊᑯᑕᑲᔭ ᒥᓇ ᑲᐎᐣ ᐎᑲ ᑭᐗᐸᒪᓯᐣ ᑯᐣ, ᑲᐎᐣᑕᐡ ᑐᐣᒋᑭᑫᑕᓯᐣ ᑲᐃᓇᐱᔑᓇᐣ᙮ ᒥᔑᐣ ᑫᑯᐣ ᑲᑲᓄᑫ ᐅᐅᐌᑎᓀᑫ ᑭᓉᐡ ᓂᑲᓂᐠ᙮᙮᙮

  • ᒪᐗᐨ ᓂᑕᒼ ᐁᑭᐳᓯᔭᐣ ᑲᑲᓯᐠ ᐱᒥᓭᐎᐣ
  • ᐁᑭᐳᓂᔭᐣ ᐃᐃᒪ ᒥᑯᒥᑲᐠ ᓴᑲᐦᐃᑲᓂᐠ
  • ᐁᑭᓀᑕᒪᐣ ᑯᐣᑕ ᐊᐦᑭᐠ ᐁᑭᐊᔭᔭᐣ ᒣᑾᐨ ᐁᐱᒥᐱᓱᔭᐣ ᐊᐊᐌ ᐃᐢᑭᑐ ᐁᐃᔕᔭᐣ ᐃᐃᒪ ᑲᐯᔑᐎᓂᐠ
  • ᑭᒪᔭᑫᑕᐣ ᔕᑯᐨ ᐅᐡᑭᔑᑾᐱᑯᐣ ᑲᑭᓯᓱᐗᐠ ᑲᑭᑭᐡᑭᑲᑌᑭᐣ ᒥᓉᑕᑯᐣ ᒣᑾᐨ ᑲᑕᑲᔭᐠ
  • ᒪᐗᐨ ᓂᑕᒼ ᐯᔓᐣᐨ ᐁᑭᐗᐸᒪᐠ ᐊᐊᐌ ᐙᑯᐡ ᒣᑾᐨ ᐁᑎᐱᑲᐠ ᒣᑾᐨ ᐁᐃᔕᔭᐣ ᑲᑕᔑᑭᔑᑌᐳᓇᓂᐗᐠ ᐁᓇᓯᑲᒪᐣ ᓂᐱ᙮ ᓂᑕᒼ ᐸᐣᑭ ᑭᑯᑕᐨ, ᔕᑯᐨ ᑭᐊᓂᓇᐦᐁᑕᐣ ᐁᑭᐯᔑᓇᐗᐠ
  • ᒪᐗᐨ ᑲᑭᓇ ᐁᐊᑌᑭᐣ ᐃᐃᒪ ᑲᑕᔑᑭᔑᑌᐳᓇᓂᐗᐠ, ᒥᓇ ᑾᔭᐠ ᑲᒥᓄᐡᑲᑫᒪᑲᑭᐣ ᐎᓯᓂᐎᓇᐣ ᑲᒥᒋᑲᑌᑭᐣ ᓂᔀ ᐯᔑᑾ ᑲᑭᔑᑲᐠ
  • ᑭᒥᒋᓇᐣ ᐃᓂᐌᓂᐗᐣ ᐁᑲ ᐎᔭᐢ ᑲᒥᒋᑲᑌᐠ ᐁᑭᐅᔑᑕᒪᑯᔭᐣ ᒥᓇ ᐁᑭᒥᓉᑕᒪᐣ ᑲᑭᐅᑕᐱᓂᑯᔭᐣ
  • ᑲᑭᓇ ᔭᐎᔭ ᑭᒥᓄᐎᒋᐌ, ᐎᐸᐨ ᑭᓀᑕᐣ ᑲᐃᔑᑕᔭᐣ ᐗᓴ ᐁᔭᔭᐠ ᑲᐃᔑᑕᔭᐣ ᐗᓴ

ᐁᑯᓀᐣ ᒪᐗᐨ ᑲᒥᓉᑕᒪᐣ ᐅᐅᒪ ᑲᑕᓇᓄᑭᔭᐣ Noront?

ᓂᑭᒋᓀᑕᐣ ᐁᑕᑯᑭᓱᔭᐣ ᐅᐅᐌ ᑲᓂᐅᒼᐱᑭᐠ ᐅᐅᐌ ᒪᒋᑕᐎᐣ ᒥᓇ ᐁᓴᑭᑐᔭᐣ ᑲᐎᑕᓄᑭᒪᑾ᙮ ᒪᐗᐨ ᒥᓉᑕᑯᐣ ᑲᑐᑕᒪᓇᐣ ᐃᓂᐌᓂᐗᐣ ᐯᔑᑯᑕᐗᑌ ᑲᑌ ᐊᓄᑭᔭᐣ ᐃᐃᒪ ᑲᐯᔑᐎᓂᐠ᙮ ᑲᐃᐡᑾ ᑲᐡᑭᑐᔭᓇᐣ ᒪᒪᐤᐱᐎᓇᐣ ᒥᓇ ᐊᓄᑭᐎᓇᐣ ᑲᒪᒋᒋᑲᑌᑭᐣ, ᐊᐗᔑᒣ ᑕᓂᒥᓉᑕᐣ ᐅᐅᐌ Noront ᑲᓂᔑᒪᒋᑭᐠ᙮ ᒪᐗᐨ ᑲᒥᓉᑕᒪᐣ ᐁᐎᒋᐗᑾ ᑲᒥᓉᑕᑯᓯᐗᐨ ᑲᐎᑕᓄᑭᒪᑾ, ᓄᐱᒪᑲᒥᐠ ᒣᑾᐨ ᑲ ᐊᔭᔭᐣ ᒥᓇ ᐁᐗᐸᒪᑾ ᐊᐎᔭᔑᔕᐠ — ᑲᐎᓂᐣ ᐁᑕ ᐅᐅᐌ ᐊᓄᑭᐎᐣ!

ᐁᑯᓀᓇᐣ ᐊᓂᐣᑕ ᑲᒪᔦᑭᓭᑭᐣ ᑲᑕᓇᓄᑭᓇᓂᐗᐠ ᐃᐃᒪ ᐃᐣᑎᔭ ᒥᓇ ᑲᑕᓇᓄᑭᓇᓂᐗᐠ ᐅᐅᒪ ᑲᓇᑕ?

ᐯᔑᐠ ᑫᑯᐣ ᒪᐗᐨ ᑲᒥᓉᑕᒪᐣ ᐅᐅᒪ ᑲᓇᑕ ᑲᑭᐱᒋᓇᓂᐗᐠ ᐊᓄᑭᐎᐣ ᑲᐃᐡᑾ ᑕᐗᑌᐠ! ᐃᐣᑎᔭ ᐊᓄᑭᓇᓂᐗᐣ ᑯᑖᓱᑭᔑᐠ ᒥᓂᑯᐠ ᐯᔑᑯᑕᐗᑌ ᑲᑭᓇᐱᑯ ᐊᓄᑭᐎᓇᐣ᙮ ᑲᔦ, ᐅᐅᒪ ᑲᓇᑕ ᑭᒋᓀᓂᒪᐗᐠ ᐊᓄᑭᓇᑲᓇᐠ ᒥᓇ ᑲᑕᓇᓄᑭᓇᓂᐗᐠ ᒥᓄᔭᐎᐣ ᒥᓇ ᐊᐣᑾᒥᓯᐎᓇᐣ᙮ ᑯᑕᐠ ᒥᓇ ᑲᒪᔦᑭᓭᐠ ᑲᐎᒋᑲᓱᐨ ᔭᐎᔭ᙮ ᐃᐃᒪ ᐃᐣᑎᔭ, ᑲᐅᑭᒪᐎᐗᐨ ᐊᓄᑭᐎᓂᐠ ᐃᓇᑲᓀᐗᐠ “Sir” ᑲᔦᒪ “Ma’am”, ᑲᐎᐣ ᐎᑲ ᑎᔑᐎᓇᓯᒥᐣ ᐅᑎᔑᓂᑲᓱᐎᓂᐗ ᐁᐃᓀᒋᑲᑌᐠ ᐁᒪᒉᒋᑲᓂᐗᐠ, ᐅᐅᒪ ᑲᓇᑕ ᑲᐎᐣ ᐃᐃᐌ ᒋᓀᒋᑲᑌᐠ᙮

ᐁᑯᓀᐣ ᒪᐗᐨ ᑲᐃᐡᐸᐠ ᐊᐣᑾᒥᓯᐎᐣ ᐎᑕᒪᑫᐎᐣ?

ᑲᐯᐦᐃ ᑭᑫᑕᓂᐣ ᑌᑎᐸᐦᐃ ᑲᐃᔑᔭᔭᐣ, ᐊᐣᑎᓀᑫᐱᑯ ᑲᐃᔑᐊᔭᔭᐣ᙮ ᑭᐡᐱᐣ ᑾᔭᐠ ᓇᓇᑲᑕᐌᑕᒪᐣ ᑲᑕᔑᐊᔭᔭᐣ ᑲᐎᐣ ᑲᑭᒪᓯᓭᓯᐣ᙮ ᑭᑭᐡᑲᒋᑫᐣ ᑲᐃᔑᑭᔑᑲᐠ ᒥᓇ ᑲᐎᐣ ᐌᐣᑌᑕᑫᐣ ᐃᐃᐌ ᓄᐱᒪᑲᒥᐠ ᑲᐃᔑᐌᐸᑭᐣ!